I-KZN iphaka impi yokulwa nezingozi zomgwaqo
UHULUMENI wesifundazwe iKwaZulu- Natal oholwa nguNdunankulu uMnu Willies Mchunu, usuhlabe ikhwela kubo bonke abasebenzisa umgwaqo ukuba babeke eqhulwini ukuphepha emgwaqeni babe ingxenye yombhidlango wokuqeda isihlava sokufa kwabantu emgwaqeni. Lokhu kulandela ukuthi isiGungu sesifundazwe siphume sahambela izifunda zonke ngomhlaka- 25 kuOctober ngenhloso yokufundisa nokukhuthaza ukuphepha emiphakathini nasemigwaqeni. Lo mkhankaso oshayelwe ihlombe yimiphakathi, uhambisana nohlelo lukaHulumeni u- Operation Sukuma Sakhe ( OSS) lapho abaphathiswa belalela, baxazulule izinselelo ezibhekene nemiphakathi emawadini. Obekwenziwa ngabaphathiswa bekuhlanganisa izivimbamgwaqo, ukuhanjelwa kwezikole ngenhloso yokubheka ukuqhubeka kwezivivinyo kumatikuletsheni, kwase kuba ukuhlolwa kwemisebenzi yengqalasizinda yokuthutha nokuvakashelwa kweziteshi zamaphoyisa ukuhlola ukuthi zisebenza kanjani. Isifundazwe sisukuma kanjena nje, uMpha- thiswa wezokuThutha, ukuPhepha nokuXhumanisa uMphakathi uMnu Mxolisi Kaunda wethule esigungwini sokuphathwa kwesifundazwe umbiko oveze ngokushona kwabantu abangu- 24 esikhathiniesingamahora angu- 24 emigwaqeni yesifundazwe. Ephawula ngesikhathi sevimbamgwaqo ku- Ennersdale, Escourt, uNdunankulu uMchunu uncome wonke amalunga esigungu sakhe, izinhloko zeminyango neziMeya ngokuzinikela ekuqinisekiseni ukuthi lolu hlelo luba impumelelo, wengeza ngokuthi uHulumeni kufanele ahole phambili ezintweni ezithinta ukuphepha emgwaqeni. “Lokhu kusebenzisana kuveza ngokusobala ukuthi uHulumeni uhola phambili uphinde uzibophezele ekuqedeni izinhlekelele nokufa kwabantu emgwaqeni. “Ngokubona izibalo zobugebengu eziphuma kamuva nje, kubalulekile ukuthi silwe nobugebengu kanye nokwephulwa komthetho emgwaqeni ngokuhlanganyela. Njengabantu futhi kuzo zonke izinhlaka, kumele sisukume sihlanganise izandla ekulweni nabo bonke ububi emiphakathini esiphila kuyo. “Izinhlekelele zezingozi nobugebengu ziyayiphazamisa inhlalakahle yabantu, okudinga izinhlaka zokugcinwa komthetho, imiphakathi nabo bonke ababambe iqhaza ukuba basebenzisane ngokuzimisela,” kusho uMchunu. Uhulumeni wesifundazwe uzibophezelele ukuqhubeka nokuqinisa umthetho nokwandisa ukubonakala kwamaphoyisa emigwaqeni, okuhambisana nemiyalezo kwizinkundla zokuxhumana kanye nokuxhumana nemiphakathi okuqhubekayo.
Lokhu kusebenzisana kuveza ngokusobala ukuthi uHulumeni uhola phambili uphinde uzibophezele ekuqedeni izinhlekelele nokufa kwabantu emgwaqeni