BEWUXUBE IZANGOMA NAMAKHOLWA UMSHADO WEZITABANE
BEKUQHUMA uhaleluya, kugida amathwasa nezangoma, kunkanise izitabane ngaphakathi nangaphandle kweJapanese Gardens, ePinetown, enyakatho-ntshonalanga yeTheku ngoMgqibelo kushada izitabane.
UMnu Bonga Zungu (28) noMnu Sakhile Motha-Zungu (31) - “oseyinkosikazi” kaMnu Zungu - bashada nje, bahlangane emcimbini wezangoma eminyakeni eyisi-9 edlule. Bekugcwele izangoma nezinyanga yize ezinye bezingayifakile imifaniswano yazo.
Lo mshado udonse amehlo abantu abaningi eMause, ePinetown, lapho lezi zithandani ebezihlala khona njengoba yilapho obekuzophothulwa khona uhlelo lomcimbi. Bekungenwa ngevosho, kuhlatshelelwa amaculo abantu abasindisiwe, kubhonga izangoma eceleni.
Umphakathi wakule ndawo ubuze uvele emawindini ufuna ukuzibonela lo mshado. UMnu Zungu utshele leli phephandaba ukuthi lolu suku lubalulekele kakhulu kuyena futhi yena nomkakhe bazohlukaniswa wukufa, kabananda- ba nokuthi abantu bathini.
“Ukuqala kwami ukumbona, sihlangane ngesikhathi eyothwasa njengoba esephothulile ukuba yisangoma, mina ngiphuma emndenini wabasindiswe.
“Ngikujabulele kakhulu ukuthi ungesekile kukho konke, ngiyazi ukuthi umphakathi kuba khona lokho kokuthi ngimshada kanjani omunye umuntu wesilisa, kodwa-ke wuthando lolu kakuyi ngobulili.
“Yingakho ngimshadile,” kusho uMnu Zungu. Unina kaMnu Zungu, uNkk Regine Zungu, uyale umakoti wakwakhe (uMnu Motha) wathi ayiphathe kahle indodana yakhe baze bahlukaniswe wukufa. Uthe uyazi ukuthi abantu bahlale bekhuluma kodwa kumele lezi zithandani ziqine emshadweni wazo njengoba zihlanganiswe nguMdali.
Bekubuye kuvuke idlozi kwabanye kube sengathi bayavevezela, kubuye kumenyezwe igama lenkosi ngaphakathi ehholo obekushadelwa kulona. Emuva komcimbi ehholo, kuyiwe kwaMotha lapho obekwabiwa khona.