Kukhuzwe ulaka lwezibhamu kokamasikandi
UKHALE wemuka nesamba semali sika-R100 000 uKhuzani “iNdlamlenze” Mpungose ngoMgqibelo emcimbini obizwa nge“Khuphuka Nezakho Sibone Inkunzi Masikandi Festival” obusezinkundleni zemidlalo iCurries Fountain Stadium eThekwini.
UKhuzani uthole le mali ngenxa yezinkumbi zabalandeli bakhe ebezibuthelene ngothi lwazo kuwona lo mcimbi njengoba bekushiwo ukuthi umculi ozoba nabalandeli abaningi emcimbini izonikezwa yena.
“Ngibonga ukungeseka njalo balandeli bakwaGuqa, asibaphushe ngawo lombala (Blue). Igama lami niliphakamisile kakhulu kuyona yonke indawo engihamba kuyona noma ngabe ngihlangana nongqongqoshe uvele athi: 'nguyena lo Khuzani onabalandeli abaningi?'
“Konke lokho kungenxa yenu. Kule mali esiyiwinile, u-R50 000 ngiwubuyisela kunina nizohlela nezinduna kumagatsha enu ukuthi niyidla kanjani lemali,” kusho uKhuzani.
Ngaphambi kokuba kumenyezelwe ekugcineni ukuthi nguyena uKhuzani ohlabene, kubizwe zonke izinduna zabalandeli esiteji zacelwa ukuba zizotshela abalandeli ngohlelo lokuvota ukuthi beluhamba kanjani.
Zonke izinduna okungeyoSaziwayo, uMhlengimali Mthembu, eyezeChalaha, okunguQhoshakufanele Mkhonza, ekaKhuzani, uMvumeleni Zwane, neyezeMfezi zigibele esteji zatshela izihlwele ukuthi amavoti abalwe zikhona futhi okuzomenyezelwa kuyikhona.
Emaqenjini abevota bekungoSaziwayo (ezakwaBuyephethe), ezeMfezi, ezeChalaha (Izihonga), nezikaKhuzani (ezakwaGuqa) kanti esangweni iqembu ngalinye belinebhokisi ebeligadwe yinduna yabalandeli yalelo qembu bese umlandeli ephonsa ivoti lakhe kulowo mculi abezombuka kanti oSaziwayo balale isibili. Bebephume ngobuningi abalandeli, baziphatha kahle nokuyinto enconywe kakhulu ngabaphathi bohlelo.
Abekhona amanye amaqembu abenandisa kodwa engavoti okubalwa Amageza, Qhosha, Mdumazi, Gadla, Mgojeli, Majotha, Mjikijeli, Dumakahle, Vumile, Malahle namanye.
Kubuye kwagetshiswa amakhanda umzuzwana kuhlonishwa umlandeli kamasikandi odubuleke washona kuyona le nkundla mhla zingama-29 kuMbasa (April) kwiNqokotho Festival kanti bane abadubuleka.
Induna yezeChalaha ikhuze ulaka lwezibhamu kumasikandi yathi akube ngezokugada imizi emakhaya ngoba emcimbini kusuke kuzojatshulwa.
Kulo mcimbi azibanga khona izidubedube nabalandeli bebehloniphana, abazange bawaphazamise amaciko.