Gwema umdlavuza ngokudla ngendlela
NAMUHLA sibheka kafushane izaba umuntu angazenza esekhaya ukulwa nanoma yiluphi uhlobo lomdlavuza. Ngokujwayelekile kule ngosi sigxila ezabeni zokunqanda inkinga ingakahlaseli ngokukholwa ukuthi khona kunezindleko ezincane kunokwelapha umuntu osebuthaka.
Kuthiwa u- vitamin B-17 uyakwazi ukuvimbela umdlavuza emzimbeni kunjalo nje, nakulowo osehlaselwe yiwona umdlavuza akhona amathuba okwelapheka.
Okwethusayo wukuthi lolu lwazi kakukhulunywa kakhulu ngalo, futhi e-United States of America (USA) inhlangano yakhona ebhekele izindaba zokudla nemishanguzo esizweni sakhona, iFood and Drug Administration, inomthetho ongakuvumeli ukwenziwa kwamaphilisi okwengeza ( supplements) ohlobo luka- vitamin B-17.
Akekho owaziyo ukuthi kungani kunjalo. Okusala lapho kuba wukuhlawumbisela kwabantu ematshwaleni, kepha imvunge yabacwaningi ithi lolu hlobo lwamavitamin lungawelapha ngempela umdlavuza. Nokho-ke lapha kwelakithi sizobheka incazelo yenhlangano elwa nawo umdlavuza, iCancer Association of South Africa (CANSA) ngalo mbandela.
Ngokwale nhlangano, u- vitamin B17 kawukho ngokwemvelo kodwa lokhu okubizwa kanjalo kuyisithako esenziwe ngabantu phakathi kwezinye izinto okuzimumethe, wubuthi obuyingozi i- cyanide.
Le cyanide ndini kubuye kwenziwe ngayo izikhali ezinobuthi njengoba umlando usibikela ngalo mkhuba ngesikhathi seMpi Yomhlaba II kanjalo nangesikhathi sempi yeIran ne-Iraq ngeminyaka ye-1980.
Ukusebenzisa imbewu yezithelo ezithile njengama- apricot - awumthombo wale cyanide kodwa ngesilinganiso nesimo esehlukile kuleso ayisona uma siwadla ngendlela ejwayelekile - yikho inhlangano iCANSA ekhala ngakho.
UKUDLA OKUSIZAYO UKULWA NOMDLAVUZA
Ngaphandle kwemithombo yale
cyanide ekwenza kube sobala ukuthi inobungozi, kukhona izinhlobo zokudla ezinawo lo- vitamin B17 kodwa ezingeni elingenabo ubungozi emizimbeni yethu nxa sizidla ngendlela yazo yemvelo.
Okumqoka wukuthi konke kuba kuhle ngokwenziwa ngesilinganiso esifanele hhayi ngokweqisa. Lapha sizobala lezo osekunolwazi lokuthi nxa zidliwa kuleso simo semvelo yazo, kaziyona ingozi.
Iningi lalokhu kudla kuvame ukuba yizithelo nemifino. Masikusho futhi ukuthi nakhona kakubi wuhlobo olulodwa lwento edliwayo olwenza wonke umsebenzi wokuphilisa kodwa umphumela uba khona ngokuba lolo luhlobo lokudla ludidiyelwe nezinye izinhlobo ezinconyiwe. Nazi ezinye zezidlo esingazisebenzisa ukuvikela imizimba yethu emdlavuzeni:
Amakinati ngezinhlobo zawo njengama- almond, ama- walnut nama- Brazil nut awumthombo omqoka we- zinc, yi- manganese, yicopper, ama- vitamin nokunye. Akunikeza amandla nokusebenza kwengqondo futhi avimbela umdlavuza.
Ama- walnut wona amandla kakhulu ekuvimbeleni umdlavuza wamadoda nowebele.
Imvelo isihlinzeka ngamaberry ngezinhlobo zawo ezinemibala eyahlukene. Lowo nalowo mbala wohlobo lwawo unokuthile okwenzayo okuqondene nalo emizimbeni yethu.
Ama- blueberry awumthombo omqoka wama- antioxidant akhuculula ukungcola okudalwa wukusebenza komzimba futhi ehlise nesifo senhliziyo. Kukhona ama- bilber
amancane kunama- blueberry wona avikela imithambo yegazi enze ngcono ukubona kwamehlo.
Ama- strawberry ane- phenpl, potassium, i- omega 3 fatty acids magnesium.
Ugalikhi uqukethe i- calcium,
copper, yi- phosphorus ne- manganese. Wehlisa umfutho wegazi unciphise ingozi yomdlavuza.
I- broccoli inonile ngama- vitayizikhucululi ( antioxidants), inciphisa ingozi yomdlavuza webele kwabesifazane, ivimbela ukuzimuka ngokweqile nesifo sikashukela nesenhliziyo. Amakhowe, yiklabishi ne-cauliflower nakho kakusali ohlwini lwezidlo ezinconywa ngabacwaningi ekuvikeleni imizimba yethu kulo mbulalazwe wesifo somdlavuza.