Usephonse ithawula ngokuvikela eseligi
UMQEQESHI weBidvest Wits useliphonsile ithawula ngokuvikela isicoco seligi usebheke ukuvika izembe nokuthatha inkomishi yeTelkom Knockout.
IWits idlulele kwi- semi final yeTelkom Knockout iguqisa ngo-1-0 iBaroka FC kwi- quarter final yalo mqhudelwano ngoMgqibelo eBidvest Stadium, eGoli.
Igoli okunqobe ngalo iWits libekwe enethini ngu-Amr Gamal ngomzuzu we-11.
IWits ifinyelele kwi- semi final nje ibinganikwa lutho njengoba izinto zingayihambeli kahle emidlalweni yeligi.
Isendaweni yesithathu uma usuka emsileni we- log.
UGavin Hunt uthi useliphonsile ithawula ngokuthi ezakhe zisengasivikela isicoco seligi.
“Indlela esiqale kabi ngayo ikubeka ngokusobala ukuthi ngeke sisasinqoba isicoco seligi kungaba ngumlingo.
"Njengamanje into emqoka wukuthi sivike izembe bese sinqoba le nkomishi.
"Angijabule kakhulu njengoba sinqobe lo mdlalo ngoba angikujwayele ukuthi ikilabhu engiyilolongayo ihlale phansi kanjena.
"Angifuni ukuqam- ba amanga nginovalo kodwa futhi nginethemba lokuthi sizowaphendula amatafula,” kusho uHunt.
UKgoloko Thobejane ocija iBaroka uthi baphunyukwe yithuba abebeligaqele lokunqoba inkomishi yabo yokuqala kulesi sigaba.
“Izinto azihambanga kahle akuhlangananga lutho.
"Bengiyibalile le nkomishi bengithi sihamba nayo kodwa akwangenzeka.