USHAQWE NGAMAPHOYISA EFUNDISA
USWELE umgodi wokucasha ngoLwesihlanu uthisha waseBizimali High School eNkandla, maphakathi neKwaZulu-Natal, kugasela abakwasidlodlo esemsebenzini bamshaqa ngezinsolo zokudlwengula umfundi (15) wakulesi sikole.
ILANGA lithole ukuthi lo thisha wesilisa - esingeke simdalule igama lakhe - oneminyaka engama-29 ubudala, uboshwe ngamaphoyisa ematasatasa efundisa. Kuthiwa lo mfundi ubehlala emqashweni nozakwabo.
Ufonelwe nguthisha esemqashweni wakhe wamcela ukuba aphumele ngaphandle ufuna ukuxoxa naye.
Kuthiwa uthisha ube esemyalela ukuba angene emotweni yakhe ngoba kunodaba afuna ukumbuza ngalo.
Esengaphakathi emotweni, uthisha uyishaye yazula, wacela lo mfundi ukuba amphelezele baye emqashweni wakhe, kunodaba olubucayi afuna ukuba balu- xoxele endlini yakhe. Nebala umfundi akazange axwaye, wenze njengoba eyalelwe nguthisha.
Kuthe uma befika endlini kathisha, wayijika inkulumo waqala wameshela emtshela ukuthi umthanda kangakanani, emthembisa izulu nomhlaba. Kuthiwa umfundi ukhombise ukungahambisani nento ebeshiwo nguthisha wacela ukugoduka.
ILANGA lithole ukuthi uthisha ube esembhudukeza umfundi, wamdlwengula ephindelela waze wamdedela esedelile ukugila lo mkhuba.
Umfundi ubikele umzali wakhe ngokumehlele kwabe sekuyovulwa icala lokudlwengula.
Leli phephandaba lithole ukuthi abazali bezingane ezifunda kulesi sikole - esidume kakhulu ngokuba nemiphumela emihle kamatikuletsheni - bebedinwe begane unwabu bethi kabasamdingi lo thisha emagcekeni esikole sabo ngoba uzokwandisa umkhokha.
"Kasisamdingi lo thisha ozosonela izingane zethu ekubeni kufundwa kahle kangaka kulesi sikole,” kusho omunye wabazali.
Okhulumela amaphoyisa aKwaZuluNatal, uCol Thembeka Mbhele, uthe umsolwa onguthisha uboshwe ngamaphoyisa ngoLwesihlanu esemsebenzini ngecala lokudlwengula umfundi wakulesi sikole asebenza kusona.
Uthi umsolwa uvelile eNkantalo yeMantshi yaseShowe ngoMsombuluko. Icala lihlehlele inamuhla ngoLwesine ukuba umsolwa ayofaka isicelo sebheyili.
Okhulumela uMnyango wezeMfundo KwaZulu-Natal, uMnu Muzi Mahlambi, uthi bazokwenza uphenyo lwabo lwangaphakathi ngalolu daba bese bethatha izinyathelo eziqinile ngalo thisha.
Uthi lokho kuzothumela umyalezo oqinile nakwabanye abasacabanga ukwenza into efana nale kwabanye abafundi.