KUBULAWE ISIKHULU SEZOKUTHUTHA ONDINI

Ilanga - - Izindaba - PAMELA ZUNGU phumelela@ilanganews.co.za

WENGANYELWE yifu elimnyama umndeni weNkosi yakwaShange eVuma eShowe, enyakatho-mpumalanga yaKwaZuluNatal, emuva kokudutshulwa kubulawe umfowabo ngoLwesibili ntambama obeyimenenja eMnyangweni wezokuThutha oNdini, enyakatho yeKwaZuluNatal.

UMnu Muntuwenkosi “Dubula” Shange (52), ongumfowabo weNkosi Vela Shange, kuthiwa udutshulwe wabulawa ngabantu abangaziwa esemsebenzini.

Kubikwa ukuthi uthole ucingo kwesinye sezisebenzi simtshela mayelana nomshini wokulungisa umgwaqo onenkinga.

Uphikelele lapho obekusebenzela khona lesi sisebenzi okuyilapho edutshulwe khona ngentululwane yezinhlamvu.

Emuva kwalokho, kuthiwa la madoda athathe imoto kamufi yasemsebenzini nesibhamu sakhe, ashaya achitha.

ILANGA lithole ukuthi uMnu Shange ushonele emtholampilo khona oNdini. Inkosikazi kamufi, uNkk Thembile Shange (48), itshele ILANGA ukuthi ibuhlungu ngento eyehlele umyeni wayo.

“Ngifonelwe ngabasemsebenzini wakhe bengitshela ukuthi usedutshuliwe. Ngigcine ukukhuluma naye engitshela ukuthi usayobheka umshini okuthiwa unenkinga esizeni obekusetshenzwa kusona.

“Ngivele ngadunyelwa yikhanda ngesikhathi ngithola umbiko ngoba bekungakapheli nesikhathi esingakanani ngikhulumile naye ocingweni.

"Ngifuna incazelo kulesi sise- benzi esimbizile sikhala ngomshini. Ngifuna sichaze ukuthi kungani sifonele umyeni wami bese eyadutshulwa kodwa sona singatholi machaphazelo,” kusho uNkk Shange.

INkosi Shange ithe ibuhlungu ngokufa komfowabo. “Inhliziyo yami ibihlungu kakhulu ngokushona komfowethu ngale ndlela. Ngiyathemba ukuthi amaphoyisa azosebenza ngokuzikhandla abathole abantu ababulale umfowethu,” kusho iNkosi Shange.

Okhulumela amaphoyisa KwaZulu-Natal, uColonel Thembeka Mbhele, uthe akhona amacala amabili, elokubulala nelokuduna imoto, avuliwe esiteshini samaphoyisa oNdini kanti bekungakaboshwa muntu. Amaphoyisa asaphenya.

Newspapers in Zulu

Newspapers from South Africa

© PressReader. All rights reserved.