Izinsongo kunina wengane yenceku engondli
Umophule edayisa ngomzimba
UDLIWA yingebhe owesifazane osaphaze umfundisi wasoNdini, enyakatho yeKwaZulu-Natal, amsola ngokuthi akayondli ingane yabo enezinyanga eziyisi-7, okugcine ngokuthi abalandela lo mfundisi bamsongele ngoba bethi ukhuluma kabi ngoyise wezokomoya.
Lona wesifazane - esingeke simdalule - uma elanda ngobudlelwano bakhe nomfundisi, uthi buqale eminyakeni embalwa eyedlule njengoba inceku imthole edayisa umzimba.
Uthi bathandanile okuthe uma esetshela umfundisi ukuthi ukhulelwe kwabe sekushintsha izinto. Inceku yeNkosi uthi imtshele emehlweni ukuthi makasikhiphe isisu ngoba kayifuni kwazi abantu ukuthi inengane ngaphandle komshado.
Lona wesifazane uthi inceku ikhale ngokuthi ukukhulelwa kwakhe kuzokwehlisa isithunzi sayo emalungeni ebandla.
“Ngimtshelile ukuthi akakwazi ukulala nami ngaphandle kwejazi lomkhwenyana bese engitshela ukuthi akayifuni ingane. Ngimtshele ukuthi ngeke ngisikhiphe isisu ngoba nami kangizimisele ngokwenza icala elinjalo,” kusho lona wesifazane ongowaseThekwini.
Uthi ngaphambi kokukhulelwa, ubudlelwano bakhe nomfundisi bebubuhle kakhulu ngoba nguyena omyekise ukudayisa ngomzimba wamyisa enyuvesi ukuyofunda.
“Kuningi okuhle angenzele khona ngeke ngiqambe amanga, ungithathe ngidayisa ngomzimba wanginakekela waze wayongifundisa enyuvesi. Sonke leso sikhathi bengazi kahle ukuthi ushadile futhi ngingenankinga ngalokho.
“Inkinga enginayo manje wukuthi akayondli nhlobo ingane yakhe futhi akanamahloni ngalokho. Sengizame kaningi ukukhuluma naye ngimtshela ukuthi ingane kayinacala, yena nje kumele ayondle, kangifuni lutho olunye kuyena,” kusho yena.
Uthi akanandaba nabamsabisayo, akwaziyo nje wukuthi konke akukhulumayo ngalo mfundisi kuliqiniso futhi uzimisele ngokukumela.
“Inkinga abantu bayathanda ukukhuluma izinto ezingabathinti nezingahlangene nabo. Mina ngikhuluma ngoyise wengane yami ongafuni ukondla, kuthi-ke bona ngoba bemazi ukuthi ungumfundisi wabo noma ubaba wabo njengoba besho bese becabanga ukuthi bazongena izindaba ezingabafuni.
“Yize bekhona abesilisa abangisabisayo kodwa kunabesifazane okuvele kungixake ukuthi bona bangajabula yini uma izingane zabo zingondliwa,” kusho yena.
Ezithombeni zalo mfundisi ezisabalele ezinkundleni zokuxhumana, kukhona esinamathiselwe ithini lobisi, amanabukeni namakhondomu.
Lona wesifazane uthi ukhethe ukubhala ngalo mfundisi ngoba akazihluphi ngokubamba izingcingo zakhe futhi nemiqhafazo yakhe akayiphenduli nhlobo.
Uthi noma ngabe uyasebenza futhi usindisiwe kodwa ngeke avume ukusetshenziswa nokuba ondle ingane yedwa ekubeni uyise edla amabele.
“Ngeke ngibe ngumzali ngedwa uyise wengane ephila. Kanginayo inkinga ukuthi sengiphenduke inhlekisa kulabo abahlekisa ngesimo sami kodwa okusalayo yena ngifuna ondle ingane yakhe,” kusho yena.
Uthi useke wamphonsela nense lelo yokuthi bayohlola igazi ukuze abe nobufakazi bokuthi ingane ngeyakhe uma enokungabaza.
“Ngilinde yena ukuba avume kuhlolwe igazi ngoba ngeke ngiyeke ukufuna isondlo kuyena ngoba kuyilungelo lengane yami,” kusho yena.
Ezinkundleni zokuxhumana abanye bakhombise ukuzwelana naye kanti abanye bakhombise ukuthi uthole abevele ekufuna njengoba ethandane nomfundisi azi kahle ukuthi ushadile.
UMaswamahle Ngubane uthe: “Hlukanani nje nomfundisi, thina-ke noma nithi unjani, uyohlale engubaba wethu eNkosini. Wayeze ashele nina nje ngoba kwenzenjani? Uma usindisiwe nje ujola kanjani nomuntu oshadile?”
UKhethiwe Chosen uthe: “Lo mfundisi makondle ingane yakhe nje avikele nesikhundla sakhe.”
UNtombfuty Ndoni MaCebisa uthe: “Ake kwenziwe ubulungiswa ebantwaneni, ngeke nilibone izulu webazalwane uma ningakwazi ukumela iqiniso. Bakithi mawahlonishwe amalungelo ezingane sakhe isizwe esiqotho, sibaphe uthando besebancane. Ngumfundisi onjani ohola ibandla ebe ephila impilo yamanga? Nizofa ningagulanga nina, ake niyeke ukuvikela izigebengu ngegama leNkosi ngoba nayo ayikufuni lokho. Nceku yondla ingane yakho.”
U-Amanda Manciya Magocoba uthe: “Sengathi uNkulunkulu angathumela leya nhlanzi enkulu eyagwinya uJonah olwandle izogwinya la madoda angafuni ukondla izingane zawo. Ume phambi kwebandla ushumayele kodwa kawukwazi nokuthengela ingane yakho amanabukeni!”
ILANGA lithole omunye wesifazane onengane eneminyaka emibili othi ngeyalo mfundisi. Naye ukhala esifanayo njengoba ethi umfundisi nokondla yinkukhu nempaka.
Leli phephandaba lizame kaningi ukukhuluma nalona wesifazane (wesibili) wathi akakwazi ukukhuluma ngoba wesaba ukuthi hleze enzakaliswe. Uvumile ukuthi unengane eneminyaka emibili nenceku lena okukhulunywa ngayo kodwa wathi akakwazi ukukhuluma kakhulu ngoba uyesaba.
Ngimtshelile ukuthi akakwazi ukulala nami ngaphandle kwejazi lomkhwenyana bese ethi akayifuni ingane.