Uboshiwe "odlelwe" indoda ngumkhokheli
"umnakwabo" Usolwa ngokuhlambalaza
SELUTHATHE elinye igxathu udaba lomkhokheli webandla leZayoni eNkanyezini osolwa ngokuvalela indoda eshadile emjondolo wakubo njengoba esevulele inkosikazi yale ndoda icala lokuthi imhlambalaza emaphepheni nokuthi iphule umthetho wencwadi yesivimbelo sasenkantolo abeyifakele yona.
ILANGA libike kabanzi ngalolu daba ngeledlule lapho uNkk Badelile Xulu, uMaShezi (54), ebesola uNkz Pinky Mnqayi (34) - ongumkhokheli ongumakhelwane wakhe eKing Dinizulu, eShowe, enyakatho-mpumalanga yeKwaZulu-Natal - ngokuvalela kubo umyeni wakhe ogulayo, uMnu Bonginkosi Xulu (55).
ILANGA lithole ngokhulumela amaphoyisa KwaZulu-Natal, uCol Thembeka Mbhele, ukuthi uNkk Xulu ukhalelwe ngamasongo kaSigonyela ngoMgqibelo ngamacala amabili avulelwe wona okungelokwephula umgomo wencwadi yesivimbelo senkantolo nelokuhlambalaza uNkz Mnqayi.
Uthi uNkk Xulu uphume ngebheyili ka-R500, kulindeleke ukuba aphinde avele eNkantolo yeMantshi yaseShowe mhla zingama-20 kuLwezi (November).
ILANGA libike kabanzi ngalolu daba ngeledlule, uNkk Xulu ebalisa ngomyeni wakhe weminyaka angasakwazi ukuxhumana naye ngenxa yokuthi uNkz Mnqayi umvalele kubo qede wamvimba ngencwadi yasenkantolo - ukuba angasondeli eduze kwakhe.
UNkk Xulu uveze ukuthi umyeni wakhe ubenemizi emibili kuleli lokishi behlala ngokuhlukana nomyeni wakhe ngenxa yokuthi (uMnu Xulu) ubegade lo omunye umuzi.
Ubedla emzini wakhe bahlukane ngoba sekuyolalwa. Uthi izinto ziqale ukonakala emshadweni wakhe ngesikhathi uMnu Xulu esethandana noNkz Mnqayi.
Uthi umyeni wakhe ubengasezwa lutho ngoNkz Mnqayi nekhadi lakhe lasebhange liphathwa nguyena (uNkz Mnqayi).
UNkk Xulu uveze ukuthi indaba kaNkz Mnqayi uyikhulume kaningi waze wazama nokuyobikela unina (kaNkz Mnqayi) kodwa kwanhlanga zimuka nomoya. Uthi kugcine ngokuba azibukele angabe esazihlupha ngokuyikhuluma indaba yabo.
Uqhube wathi into emenze wasukuma wukubona ukuthi umyeni wakhe useyagula, enja- lo nje akanakiwe.
Uthi ubemphekela ukudla amhambisele emzini wakhe lo ahlala kuwona noNkz Mnqayi, amgwinyise amaphilisi. Uthi indaba yonakale ngesikhathi uNkz Mnqayi esethutha zonke izimpahla emzini womyeni wakhe qede wabuyela kubo.
Ushiye uMnu Xulu ehleli yedwa endlini, engenakho ngisho ukudla - ngokusho kukaNkk Xulu odabeni lwethu lokuqala.
ILANGA likhulume noNkk Xulu okuqinisekisile ukuthi kade eboshiwe.
“Ngithathwe ngamaphoyisa ngoMgqibelo angitshela ukuthi ngivulelwe icala, ngize ngaphuma ngebheyili ka-R500,” kusho uNkk Xulu.
Imizamo yeLANGA yokuthola uNkz Mnqayi iphunzile, ucingo lwakhe belukhala lungabanjwa.
Odabeni olwedlule uveze ukuthi uyingoduso kaMnu Xulu futhi banezingane ezimbili.
Uphinde waveza ukuthi uMnu Xulu nguyena omlandelile wacela ukuhlala naye kubo ngemuva kokuba esemshiyile emzini.
Uveze ukuthi uhambe emzini kaMnu Xulu inhlalo ingaseyinhle njengoba uNkk Xulu ubeseke wamphakamisela nesikhali bexabana.