ULAXAZE UMSEBENZI WASUNGULA IMIDLALO
ULAXAZE umsebenzi kwaSandisk - okuyinkampani eyenza omakhalekhukhwini -walandela iphupho lakhe lokusungula imidlalo emibili owesilisa waseQueensurgh, entshonalanga yeTheku.
UMnu Khangelani Gama (45), ongumnikazi weZikhe (PTY) LTD - okuyinkampani ehlela imidlalo iGame for All neKnow my Africa - unxenxa abantu abamnyama ukuba bafunde ukusungula izinto ezithi bona, bahlukane nokufuna ukuthenga ngaso sonke isikhathi.
Utshele ILANGA ukuthi uqale ukusungula le midlalo ngowezi-2014 ngemali ayithole emsebenzini ngesikhathi eshiya. Uthi ubenomqondo wokusungula le midlalo ngesikhathi esasebenza.
“Ngiqunge isibindi ngesula emsebenzi ngoba ngidinga imali yokusungula le midlalo. Kungisizile ukushiya emsebenzini ngoba ngabe kanginaso isikhathi sokubhekana nayo.
"Into engiyithanda ngayo wukuthi iyafundisa futhi yenza ukuba imindeni nabangani bakwazi ukuchitha isikhathi ndawonye. IGame for All igxile ezinombolweni nasekuxukuzeni umqondo, iKnow my Africa yona ikufundisa kabanzi nge-Afrika nokuthi inothe ngani - igxile kwizindawo, wumlando nezomnotho zamazwe ase-Afrika.
"Kunabantu abebengenalo ithemba lokuthi ngizoyisungula le midlalo ngenxa yokuthi bebengibukela phansi. Singabantu kumele singazenyezi futhi sizitshele ukuthi into izosehlula singayizamanga.
"Kuhle umuntu ehluleke ezamile kodwa angadikibali ngenxa yokwehluleka, asukume azithathe ngoba kasazi ukuthi inhlanhla ilelephi.
Nginethemba lokuthi imidlalo engiyisungulile izongivulela iminyango yokuthi ngisungule eminye,” kusho uMnu Gama.
Uya ezindaweni ezahlukene ukuze adayise le midlalo yakhe - lapho afike abachazele abantu ngayo.
"Kangiziboni ngisebenza futhi, ngiyathemba ukuthi konke kuzongihambela kahle ukuze ngikwazi ukuqasha abantu engizosebenza nabo. Okwamanje ngisasebenza ngedwa ngoba ibhizinizisi lisakhula,” kusho yena.