Indumezulu yomcimbi kamasikandi eThekwini
Uzwano kubaculi Kugqugquzelwa
BAZOSULWA izinyembezi abanye babaculi abakhala ngokuvalelwa ngaphandle emicimbini eminingi kamasikandi njengoba bezoqashwa kwindumezulu ezodidiyela inqwaba yamaciko mhla zingama-25 kuLwezi (November) ezinkundleni zemidlalo eCurries Fountain, eThekwini.
UDkt Andile “Mzimbokhalimali” Dlamini uhlele umcimbi obizwa ngoKuthula Art Promotion okuhloswe ngawo ukugqugquzela uzwano kubaculi nakubalandeli babo. Utshele ILANGA ukuthi inhloso-ngqangi enkulu wukwexwayisa amaciko ngobungozi bokungcofana okugcina sekukapakela kubalandeli, wukuhlukunyezwa kwabesifazane nabakhubazekile nokunye okuningi.
Uthi bese siside isikhathi kukhona amaciko akhala ngokushiywa ngaphandle uma kunemicimbi, yingakho uKuthula Art Promotion kuhlukaniswe izigaba ezintathu lapho kuzobonakala khona abasavelela, abesifazane bodwa kanjalo nasebemnkantshubomvu.
Uveze ukuthi njengoba bekunabaculi abebevotelwa, kunemihlomulo yemali engaphezulu kuka-R200 000 ezohlonyuliswa ngamaciko ngokwezigaba zawo kanti umlandeli oyedwa onenhlanhla uzozihlomulela ngeVW Polo Vivo - ngokuthumela igama elithi “Ukuthula” kule nombolo: 33563.
“Umncintiswano wethu uvuleleke kuwona wonke amaciko azohlomula ngezindlodla zemali. Inhloso enkulu wukuthokozisa amaciko ngomsebenzi wawo.
“Umthandi kamasikandi angavotela umculi wakhe ngendlela athanda ngayo kanti nokuthenga ithikithi lomcimbi ungazibeka enhlanhleni yokuhlomula imali enkulu,” kusho uDkt Dlamini.
Uthi nomlandeli ovote kakhulu angazibeka ethubeni lokuhlomula ngemali esuka ku-R7 000 kwabathathu abazoba nenhlanhla kanti amaciko wona eyawo izoqala ku-R50 000.
Kulo mcimbi kuzonandisa uGadla, uKhuzani, uVumile Mngoma, uQhosha, uBheki Mshengu, oCelazimnike, uNtshebemnandi, iGcokama Elisha, uMjikijelwa, aBafana bakaMgqumeni, uMgojeli, uMalahle, uMjikijeli, uMajotha, uSgwebo Sentambo, aMageza Amahle, uBuselaphi, oJealous Down Zulu Messengers, aMakhabazela nabanye, kanti amathikithi atholakala ngo-R100 e-computickets, kwaShoprite nakwaCheckers, ILANGA lingabaxhasi balo mcimbi.
Ngemininingwane kungaxhunyanwa nale nombolo: 084 521 9486 noma 072 774 6107