ZIZOBE ZIBUYA E-DUNDEE
KUBOSHELWE izingwazi emcimbini oba minyaka yonke owaziwa ngokuthi yiDundee Experience ozoba seDundee Horse Race mhla zimbili kuZibandlela (December).
Lo mcimbi, okulindeleke ukuba ube sezingeni eliphezulu kakhulu kunakuqala, uhlelwa yinkampani kaMnu Vezokuhle Nala, iThe Village Events, kanti kuzobe kungokwesithathu wenzeka.
Ekhuluma naleli phephandaba uMnu Nala, uthe lizokwenyuka izinga kulo nyaka ngoba kulena emibili eyedlule bafunde okuningi, okuzokwenza bawenze ngenye indlela kulokhu.
“Ngonyaka wokuqala besisawethula nokuthe ngonyaka odlule safunda okuningi. Manje sesiyawuthatha siwubeka kwelinye izinga njengoba uzoqala ekuseni ngehora lesi-9, lapho kuzoba nethuba lokuthi abantu abahambele lo mcimbi bazivocavoce noSomizi (Mhlongo).
“Emuva kwalokho kuzoba nomjaho wamahhashi kuze kushaye izikhathi zantambama, ngaphambi kokuba kuqale ifestiveli lapho abaculi abangaphezulu kwama-30 bezobe beshiyelana isiteji. Sifuna abantu abazobe bewuhambele bangawuvali umlomo,” kusho uMnu Nala.
Uqhube wathi ngisho indlela abazophathwa ngayo kuzobe kuyindlela eyehlukile kakhulu njengoba, bazothola ukunakwa okusezingeni eliphezulu kakhulu,” usho kanje.
Uthi le festiveli ivula amathuba omsebenzi kubantu abangaphezulu kwabangama-200 baseDundee namaphethelo, ikakhulukazi labo abangaphansi kukaMasipala uMzi- nyathi.
“Ngisho abaculi abasafufusa nabo sibavulele ithuba lokuba banandise emini ngaphambi kokuba kuqale abaculi laba abaziwayo. Sinezinhlelo ezinkulu kakhulu ngalo mcimbi njengoba sifisa ukuba ngonyaka ozayo sibe sesiwubeke kwelinye izinga,” echaza.
Phakathi kwabaculi ababoshelwe kule festiveli nabazobe beshikishisa ufudu kubalwa uDJ ongaconsi kubalandeli bakhe nosewole izindondo emicimbini eminingi, nophinde wazakhele igama nasemazweni amaningi aphesheya kwezilwandle, uNathi Maphumulo odume ngelikaDJ Black Coffee, yinsizwa esematheni kakhulu kulezi zinsuku, uSjava, iMafikizolo, Kwesta, Khuzani, Amageza Amahle, Ntando, Nathi, Durban’s Finest, Thebe, Vetkuk vs Mahoota, uKhaya Dladla odume ngelikaGC emdlalweni kamabonakude, Uzalo, Babes Wodumo, Shwi noMtekhala, Vusi Nova, DJ Shimza noDJ Mngadi.
Amathikithi asukela ku-R100 kuya ku-R600 ngezigaba ezahlukene.
“Amathikithi aseqalile ukutholakala e- computicket kanti sicela abathandi bobumnandi bangaphathi amabhodlela notshwala njengoba budayiswa khona emcimbini,” kusho uNala.