UKUBIZELWA ENTWENI ENIKWE ISIKHATHI ESINQUNYIWE
GALATHIYA 3:23-25 II KWABASEKORINTE 3:13
NAMUHLA ngifisa sisizane nohlobo lwabantu olubizelwe ezintweni ezinikezwe isikhathi esithile bese kuyaphela ngazo, ukuze uma sesifika bamukele ukuthi sekuyisikhathi sezinye izinto.
Kuyenzeka kube nalolu hlobo lwabantu olungafuni ukwamukela uma sekufike isikhathi sokuphela kwalokho abebephathiswe khona kodwa bafune ukuphoqa ukwenza into okungaseyiso isikhathi sayo.
Esikuthola kula mavesi esifunda kuwona namuhla wukuthi uMose wayebizelwe ohlotsheni lwento okwakuzohamba kuhambe kufike isikhathi sokuphela kwayo. Inkinga esifundiswa ngayo ngobizo lukaMose wukuthi akavumanga ukwamukela uma sekufika isikhathi sokuphela kwalokho obekuzakuphela.
Kunalokho wakhetha ukumboza ubuso bakhe ngendwangu ukuze abantwana bakwa-Israel bangabubuki ukugcina kwalokho okwakuzophela. Esingakuchaza ngobizo lukaMose wukuthi wayesetshenziswa ekulindiseni abantu kuze kwembuleke ukukholwa kwabo, okwathi uma sekufikile kwabe sekuba wukuphelelwa yisikhathi somthetho ubizo lwakhe obelusebenza ngawo.
Ngamanye amazwi wayesetshenziswa kubantu okwakuzohamba kufike lapho bembulekelwa khona ngenye into kodwa engasaphathisiwe yena. Ukwembuleka kwevangeli kwakusho ukwehlukana kwakhe nabantu ababesetshenzwa nguyena ngomthetho.
Singakusho kucace ukuthi abantu ababesetshenzwa nguyena babengekho endaweni yokugcina uma bekuyena, babesazodlulela kulokho okwasekwembulekile, okuwukukholwa nguJesu uqobo lwakhe.
Kunabantu okumele bamukele ukuthi bathunywe kubantu abalindele ukuqhamukela entweni ethile, okuthi uma sebeqhamukele kuyona kube wukwehlukana kwabo nalabo bantu abebebasebenza.
Baningi nanamuhla abantu abangafuni ukwamukela uma sekufika isikhathi sokuphela kwabebekuphathisiwe. Kunalokho bancamela ukuphoqa isimo ngokuyenza ngenkani leyo nto esiphelelwe yisikhathi.
Ngokwenzenjalo, usuke uzilimaza ngoba kakube kusalunga lutho oluqondene nayo. UMose wabhekana naleso simo sokungemukeli ngoba wayesehambe ukhalo olude nabantu ayebizelwe kubona kanti kuzofika isikhathi sokuba kube khona okwembulekayo okuzobasusa kuyena.
Kunabantu abathunywe ukwenza into ethile kumuntu bese bemdedela adlulele lapho eya khona.
Ngenxa yokungafuni ukwemukela lolo hlobo lokuthunywa, kunabantu abagcina ngokwakha amabandla ngabantu obekumele benze okuthile kubona bese bebadedela baye lapho beya khona. Lokho kwenza labo bantu ababanjiwe badale isiphithiphithi ngenxa yokuthi bekufanele ngabe sebedlulele phambili.
Kunabantu ababizelwe ukusebenza umuntu njengesiguli - okuthi uma sigula bese siyiswa emtholampilo. Lapho siyela ukuba sisizakale kulokho okwenzeka empilweni yaso.
Uma sesilashiwe siye siphindele ekhaya. Kakwenzeki ukuba isibhedlela sijike sibe yikhaya laso. Kunjalo nasempilweni yethu yokomoya maqondana nalabo ababizelwe ukuba sisizakale ngabo, kuba nalabo esibekwa ezandleni zabo ngokuphelele kube nesidluliswa ezandleni zabo ukuze kulungiswe izinto ezithile empilweni yethu.
Qaphela: uma kunabantu ababekwe ezandleni zakho ngokuphelele, ungabenqabeli uma kunezandla okumele badlulele kuzona ngokwenkinga edinga bona ngoba bazobuyela ezandleni zakho emuva kokuba besizakele kulokho okungaphathisiwe wena.
Qaphela ukuthi kawubi ngowasesibhedlela obulashelwa kusona noma sewuphila. Kunabantu abangathunyiwe lutho ngokuqala amabandla abazowaphatha kodwa bona bathunywe ukwenza into ethile kumuntu bese behlukana naye. Kakusibona bonke abantu abanenkonzo yokuphulukisa okumele ukuba babe namabandla abo, kodwa abakuphiwe wukuphulukisa abantu bese bebadedela.
Labo bantu babonakala ngokuba babenokuphulukisa okuhamba kodwa okuphoqa ukuba abantu ababasebenzayo bahlale bethandazelwa ngisho sebephila. Kusuke sekuyinkinga enkulu uma umuntu othandazelwayo esephilela lokho impilo yakhe yonke ngoba kuyafuneka kufike lapho ephila khona ukuze kwedlulelwe nakwabanye.
Ekusetshenzisweni ezintweni esibizelwe kuzona, sinezinhlobo ezehlukene zokubizelwa kwethu. Kunalabo abasetshenziswa kubantu abalethwa ezandleni zabo, kube nabasetshenziswa kubantu ukubayisa lapho beya khona. Qaphela-ke ukuthi uma umuntu esefikile lapho eya khona, uyehla kuleyo nto abeyigibele. Lalela uDkt M.S. Mncwabe kwiNANDA 88.4 FM njalo ngeSonto ngo6-9 ebusuku ohlelweni “UBIZO LWAKHO” Calling Promotions Ministries 433 Mahatma Gandhi ( Point Road ) ETHEKWINI