OweBafana uhlela umqhudelwano
Ubuyisela emphakathini wangakubo
USUNGULA umqhudelwano okuhloswe ngawo ukuvundulula abadlali uThami Mkhize oyisiqongqwane seCape Town City neBafana Bafana.
UMkhize uthi lo mqhudelwano uzokuba ngoZibandlela (December) ngakubo KwaXimba, kanti uzokuba minyaka yonke.
Akakalikhiphi usuku oluqondile kodwa uthi uzovuleleka nakumakilabhu angaphandle kwaKwaXimba. UMkhize uhlela lemi dlalo ngokubambisana noMkhambathini Local Football Association (LFA) ongaphansi kweSouth African Football Association (Safa) uMgungundlovu Region.
“Baningi abadlali abanekhono KwaXimba. Thina esesiphumelele kumele sisungule izinhlelo zokuvundulula abanye abadlali. Ukudlala kwami, uNkanyiso Mngwengwe noBongi Ntuli kwiAbsa Premiership kukhomba ukuthi indawo yangakithi inothile ngabadlali. Kukhona nabadabuka KwaSwayimane okuyindawo eseduze nakithi. Nginqume ukubambisana neLFA ngoba yiyona eyengamele unobhutshuzwayo ngasekhaya. Ngicele abaholi beLFA ukuqhamuka nosuku ngoba mina ngimatasa kwiCity.
"Yibona abasingethe zonke izinhlelo ngoba mina ngibambekile,” kusho uMkhize ophinde wabizwa kwiBafana Bafana ezodudulana neSenegal emidlalweni emibili yokuhlungela iNdebe yoMhlaba ezokuba ngonyaka ozayo eRussia.
Ephawula ngokuqhubeka ekilabhini yakhe uMkhize, uthe: “Sijabule ngokunqoba iFree State Stars ngo-1-0 ngeledlule. Bese siphatheke kabuhlungu sonke lapha ekilabhini njengoba bese sinebhadi lokuhlulwa imidlalo eminingi ilandelana. Sesikudlulisile ukuhlulwa yiSuperSport United kowamanqamu weMTN8 ngenyanga edlule eThekwini. Sibonga kakhulu kumqeqeshi wethu uBenni McCarthy obelokhu esigqugquzela,” kusho uMkhize okugcizelele ukuthi uzozikhandla kakhulu kwiBafana ukuze azibeke ethubeni lokufeza iphupho lakhe lokuyodlala e-Europe.