UMQEQESHI KAGONYA UZOPHUTHWA YIMPI
USIZWE Mthembu ongumqeqeshi wesibhakela uphuthwe yithuba lokuphelezela ibhokisa lakhe uSiboniso “Tiger Gonya” ophonsele inselelo uZolani “Last Born” Tete oyingqwele yeWorld Boxing Organisation (WBO) Bantamweight empini ezokuba ngoMgqibelo mhla zili-18 kwephezulu eBelfast, eNorthern Ireland, e-United Kingdom (UK).
UMthembu uhoxisiwe kulolu hambo ngenxa yokuthi bekumele abonane nodokotela omxilonga iso elimhluphayo.
UMthembu usesiyekile isibhakela ngenxa yokulimala esweni, kanti usejoyine ithimba labaqeqeshi be-Ethekwini Boxing Gym eliholwa nguZwi Magudulela. Ithimba likaGonya lizofulathela elakuleli kusasa ngoLwesihlanu ukubhekisa amabombo e-Ireland.
UGonya uzohamba noZwi, uThulani “Nkunzi” Magudulela ongumqhathi wezimpi zakhe kuleli no-Innocent “Tycoon” Mantengu ozomsiza ngokungcweka ngapha- mbi kwempi. UMantengu uyingqwele ye-IBF All Africa featherweight.
UTete unezimpi ezingama-28 kanti usanqobe ezingama-25 wahlulwa kwezintathu. Uqale ukulwa ezingeni elikhokhelayo ngowezi-2006 ehlula u-Andile Solani. UGonya unezimpi ezili-12 kanti usanqobe ezili-11 wahlulwa kanye, kanti ungene ezingeni elikhokhelayo ngowezi-2011 ehlula uSakhile Shangase.
UTete uthi lempi ngeke ifike emzuliswanweni wesihlanu, kanti uGonya uthi akasafuni ukukhuluma kodwa uzokhulunyelwa yinqindi eringini ngosuku lwempi. UTete uselwe izimpi eziyisihlanu e-UK kanti uGonya uzokube eqala ukuya khona. UTete uselwe izimpi eziyinqwaba emazweni angaphandle kanti uGonya uzokube elwa okwesibili ngaphandle kwakuleli.
Le mpi ihlelwa nguFrank Warren onguphromotha kaTete asayine ngaphansi kwakhe ngowezi-2015. UGonya uma enqoba le mpi uzohlelelwa nguWarren izimpi okuzomnika imali eshisiwe.