IZIGIDI ZOKUVALA ESIKA-BILLIAT
IMAMELODI Sundowns isikhiphe itshe le mali yalibeka eceleni ukuze ithenge umdlali weMaritzburg United efuna ukuvala ngaye isikhala sikaKhama Billiat okuthiwa ufuna ukuhamba kule kilabhu.
Inkontileka kaBilliat neDowns iyaphela uma kusongwa isizini.
IDowns isizame kaningi ukuba lo mdlali elule inkontileka kodwa uyanqaba.
IChiefs kuvela ukuthi imeshela isinyenyela kanti lo mdlali kuthiwa usayilindisile njengoba kukhona namakilabhu ase-Europe mfu- nayo.
Leli phephandaba lithole ukuthi iDowns isibeke eceleni u-R6-million efuna ukuthenga ngawo u-Evans Rusike weMaritzburg United.
Kuthiwa uPitso “Jingles” Mosimane ongumqeqeshi weDowns uzimisele ngokuthi lo mdlali kube nguyena ovala isikhala sikaBilliat uma kungukuthi ugcina ngokuhamba.
Leli phephandaba lithinta uThulani “TT” Thuswa wezokuxhumana kwiDowns uthe okwamanje akukho angakuphawula ngodaba oluthinta abadlali aba- bafunayo ngoba isikhathi asikabavumeli.
Uthi ngodaba lukaBilliat kusathule njengoba kuyikhalenda lemidlalo yeFifa.
UFarook “Ntshebe” Kadodia ongumnikazi weMaritzburg uthi uzimisele ngokumdedela uRusike uma kukhona ozoqhamuka nento ehambisana naye.
“Okwamanje akekho oseze kimini kodwa ngingakuqinisekisa ukuthi uRusike usendalini uma kukhona omfunayo ngingamlalela ukuthi uza nani.
Uma ngigculiseka ngizomdedela,” kusho uKadodia.