IMIDLALO EHLUKENE E-MOSES MABHIDA

BAZOJATSHULISWA ngemidlalo enhlobonhlobo abathandi bezemidlalo kulesi sifundazwe njengoba kuzoba nomcimbi omkhulu obizwa nge: “We are Football” ozokuba kusasa ngoLwesihlanu ngo-18h00 usongwe ngoMgqibelo ntambama eMoses Mabhida Peoples Park, eThekwini.

Lo mcimbi uhlelwe ngenhloso yokubungaza iminyaka engama-25 elakuleli lemukelwa ebholeni lo mhlaba yiFederation of International Football Association.

Kulo mcimbi kuzobe kuboshelwe izingwazi ezihlonishwayo ebholeni lakuleli okungabalwa kuzona uLucas “Rhoo” Radede, uTeko “Donadoni” Modise, uDoctor “16 V” Khumalo, uMacBerth Sibaya noPhilemon “Chippa” Masinga ukukha phezulu.

Uzovulwa ngokubukwa komdlalo obhekwe ngabomvu lapho iBafana Bafana izobhekana khona neSenegal kowokuhlungela indebe yomhlaba ngoLwesihlanu ngo-18h00 ePeter Mokaba Stadium , ePolokwane.

Kuzobe kunobhazabhaza wethelevishini ePeoples Park.

Kwimidlalo ezodlalwa kungabalwa eye- PlayStation neye- six a side.

Ukujoyinela ukudlala iPlayStation ngu-R300 kwisix a side ngu-R6000. Kulo mcimbi kungenwa mahhala. Ngemininingwane yokujoyina ungena kwiwebsite ethi: www.wearefootball.co.za.

Kuzophinde kunandise oDj abahlonishwayo kuleli okungabalwa kubona uDJ Tira noTbo Touch ukubala abambalwa.

U-Errol Madlala ongomunye wabagqugquzeli balo mcimbi uthe: “Ibhola yibhola ngoba lithandwa ngabantu yingakho senze lo mcimbi ukuze sibe ndawonye ukuzokweseka iBafana Bafana.

Sikhethe iMabhida ngoba iBafana Bafana igijime umdlalo wayo wokuqala yamukelwe ebholeni lo mhlaba ngowe-1992 ihlula iCameroon ngo-1-0 kulo leli dolobha,” kusho uMadlala.