Usizi luzwa olunye kuStuart Baxter
Izinkinga ezihaqe iqembu zimqinisa idolo ngokunqoba
USIZI luzwa olunye kumqeqeshi weqembu lesizwe lakuleli iBafana Bafana ebhekene nomdlalo omqoka. IBafana izodudulana neSenegal kowokuhlungela iNdebe yoMhlaba kusasa ngoLwesihlanu ngo-19h00 ePeter Mokaba Stadium, ePolokwane.
IBafana ihaqwe yizinkinga zabadlali njengoba iya kulo mdlalo okufanele iwu-nqobe kumnyama kubomvu.
Empeleni kufanele iyinqobe yomibili imidlalo ezoyigijima neSenegal njengoba olandelayo ungoLwesibili kusihlwa kulo leliya lizwe.
Selokhu kuqale ikhempu izinto azimhambeli kahle umqeqeshi uStuart Baxter njengoba kunezinkinga ezithinta abadlali.
Kusalindwe umbiko wodokotela ngo-Itumeleng Khune ongunozinti olimale ngeledlule iKaizer Chiefs ibhekene neChippa United koweTelkom Knockout.
UKhune uchachanjelwe yithambo ebusweni eshayisana noKurt Lentjies weChippa United naye obhinyilike ihlombe.
Kubikwa ukuthi kungenzeka uKhune adlale efake i- mask evikela ubuso kodwa konke lokho kuzoncika ekutheni odokotela bamthole esesimweni esinjani njengoba ehlolwe izolo ntambama nokho ujime waze waqeda izolo.
Kusabhekwe indaba kaKhune nje, uThulani Serero ushaye isiteleka njengoba engabonwa nangokhalo ekhempini.
Kubikwa ukuthi ulibeke ngesihloko elokuthi ngeke alubhade ngoba vele akasetshenziswa.
NoHlompho Kekana uhoxisiwe esikwatini indawo yakhe yathathwa nguTiyani Mabunda. Uhoxiswe ngoba kushone umkhwekazi wakhe engozini yemoto okuthiwa ubehamba nengane yalo mdlali eneminyaka yobudala emibili kodwa yona yaphuma ingenalutho.
U-Andile Jali yena ophume phakathi nejimu ngeke abonakale emdlalweni wokuqala.
Lishone elayizolo ngoLwesithathu uBaxter esabambe umoya ngoSiphiwe Tshabalala osanda kushaya ibuya kwiBafana okuthiwa unokuthinteka.
UThulani Hlatshwayo naye obenokuthinteka kuthiwa usengumqemane kodwa odokotela basamuqaphile.
UBaxter uthi ngendlela okunezinkinga ngayo ekhempini yakhe yizona ezimqinisa idolo ukuthi bazophumelela.
“Ngesinye isikhathi izinkinga yizona ezikuqinisayo ezikwenza ulwe ngokuphindiwe.
"Sinzima isimo esibhekene naso ngoba sithinta abadlali abamqoka kodwa-ke baningi abadlali futhi bonke njengoba belana akufanele sibenze bazizwe bengabalulekile bengabantu abangeke bakwazi ukwe-nza umsebenzi.
"Isikhathi sihambile manje umdlalo ususeduze okumqoka wukuthi sikuqinisekise ukuthi siyawunqoba lo mdlalo.
"Ithemba nginalo yinqobo nje sizokwenza konke esikuhlelayo,” kusho uBaxter.
Njengoba iBafana iqhathanisa usizi nje ziwuju kwiSenegal njengoba izinto zayo ziyihambela kahle.
USadio Mane ogijima kwiLiverpool yase-England obelimele ubuye ngezinkani.
Ngeledlule wakhe amagoli amabili ezakhe zinenebula ngo-4-1 iWest Ham United koweBarclays Premiership.
Enkundleni yakhe yokuxhumana i- twitter emuva komdlalo uMane uveze ukuthi uzizwa ezelwe kabusha.
Uze walibeka ngesihloko elokuthi usebheke ukuyosiza izwe lakhe lingene lishibilika emqhudelwaneni wendebe yoMhlaba oseRussia ngonyaka ozayo.