Uvalo kuntshontshwa abafundi bebulawa
Kusolwa owesifazane abebemazi
BABULAWA yingebhe abazali bezingane ezifunda eClairwood Boys Primary, eClairwood, eningizimu yeTheku, emuva kokuntshontshwa kwabafundi ababili ngoLwesine kusihlwa, omunye kwatholakala isidumbu sakhe silahlwe eduze kukajantshi wesitimela eMontclair - ngakhona eClairwood.
ULuyanda Msomi (10) noNjabulo Mankayi (10), abebehlala eSeaview, eningizimu yeTheku, bebefunda uGrade 3 bengahlukani ngenxa yokuzwana.
Kulesi sigameko kusolwa owesifazane oshaqwe ngamaphoyisa ngoLwesihlanu kusihlwa eyophenywa emuva kokuba kube nezinkulumo ezithinta igama lakhe.
Ngokuthola kweLANGA, isidumbu sikaLuyanda sitholwe eduzane nojantshi wesitimela kanti uNjabulo silobe izolo ngeSonto engakatholakali.
Kuthiwa lona wesifazane ubethandana noyise walo mfundi ongakatholakali, okungacaci ukuthi ngabe ubethi ulaya yena yini njengoba kuvela ukuthi bahlukane ngenyanga edlule - ingane kakuyona eyakhe lona wesifazane.
Umthombo uthi amaphoyisa athathe umakhalekhukhwini walona wesifazane ayolalela izingxoxo ebezenziwa ngawo kwabe sekuzwakala ukuthi uke wakhuluma nenyanga ethile, okunezinsolo zokuthi bekufuneka izicubu zengane.
Kuthiwa laba bafundi bantshontshwe sekuphume isikole njengoba kuvela ukuthi kunamalunga omphakathi ayibonile imoto emhlophe yalona wesifazane ngasezinkundleni zemidlalo zalesi sikole, exoxa nazo lezi zingane.
“Izingane ziphumile njengazo zonke kwaba khona abazibonile zixoxa naye lona wesifazane. Ubuziwe ngazo wathi yena akazi lutho, uxoxe nazo wazishiya lapho ebezidlala khona, uziphe imali yokugibela ngoba bese zishiywe yibhasi.
“Kunamalunga omphakathi athi azibonile ngezithuba zehora lesi-8 ebusuku emzini wakhe lona wesifazane, kwaqala lapho kwashayisana ukukhuluma. Amaphoyisa amlandile amphenya, waphika walala ngomhlane.
“Le ngane okutholakele isidumbu sayo, siyasola ukuthi beyibulawa ngoba kuqedwa ubufakazi - kwazise lezi zingane bezingahlukani, bezizwana kakhulu. Isidumbu sayo besingalimele kodwa kubuke- ka sengathi iklinyiwe,” kusho umthombo.
Kuthiwa lona wesifazane ubuziwe ukuthi uphi lo omunye umfundi - ngoba ubesezivumele emaphoyiseni ukuthi ubabulele - ukhombe emfuleni obizwa ngeManzamnyama, oseduze nale ndawo, wathi usilahle khona isidumbu nakuba besingakatholakali.
Izolo ngeSonto amaphoyisa abekhiphe nezinja kuthungathwa lesi sidumbu. ILANGA lithole ukuthi lona wesifazane unayo ingane efunda kulesi sikole.
UMnu Siyabonga Njokweni, ongunobhala wesigungu esilawula isikole, utshele ILANGA ukuthi basadumele ngokwenzekile ngoba kukhombisa ukuthi izingane zabo kaziphephile.
“Izingane zithathwe sekuphume isikole ngezikhathi zakusihlwa kwaba khona-ke osolwayo, sesishiyele amaphoyisa ukuba aqhubeke nomsebenzi wawo. Sibuhlungu kakhulu ngalesi simo esikhombisa ngokusobala ukuthi abantu kabanawo unembeza,” kusho uMnu Njokweni.
Okhulumela uMnyango wezeMfundo KwaZulu-Natal, uMnu Kwazi Mthethwa, uthi badumele ukuzwa izindaba ezifana nalezi wabe esedlulisa amazwi enduduzo emndenini.
“Ungqongqoshe uyabathanda kakhulu abantwana okuyibona abazosiza isizwe kusasa, yimibiko ebuhlungu lena kodwa-ke sinxusa amaphoyisa ukuba enze umsebenzi wawo,” kusho uMnu Mthethwa.
UMnu Terrance Msomi, okunguyise kaLuyanda obekusatholakale isidumbu sakhe, ukhale ngokuthi usemakhazeni ngeke akwazi ukukhuluma.
Esephinda ethintwa, ucingo lwakhe belungasangeni.
UMnu Thandazi Mankayi, uyise kaNjabulo, ukhale ngokuba matasatasa ngesikhathi ethintwa yileli phephandaba.
Okhulumela amaphoyisa KwaZulu-Natal, uColonel Thembeka Mbhele, uthe amaphoyisa aseBrighton Beach abophe abasolwa ababili emuva kokwenza uphenyo olunzulu, okulindeleke ukuba bavele enkantolo maduze. Uthi sitholakele isidumbu somfundi oyedwa.
“Abasolwa bazobhekana namacala okuthumba nokubulala, okwamanje amaphoyisa asathungatha omunye umntwana,” kusho uColonel Mbhele.