BAGXEKA UZODWA WABANTU ABEPOLITIKI
EZEPOLITIKI: UZodwa uthi mhlawumbe abamazi kahle
IZITHINTELE iminyovu neziqandi kuZodwa Rebecca Libram - odume ngelikaZodwa Wabantu - iYoung Communist League of South Africa (YCLSA) enike lo nontandakubukwa izinsuku eziyisi-7 ukuba anikele emahhovisi alolu phiko lwentsha yeSouth African Communist Party (SACP) ukuba ayofundiswa indlela yokuziphatha.
Le ntokazi eyisilomo kwabaningi - edume ngokushaya imidanso eshiya abesilisa bekhamisile kwazise yona nedilozi yinkukhu nempaka - iYCLSA ithi kakufanele ivele emphakathini ngoba ingomunye wabantu abenza kube lukhuni satshe ukuqhuba umkhankaso wokulwa nokuhlukunyezwa kwabesifazane eNingizimu Afrika.
Eralini yeSACP - edume ngeleRed October - ebiseSugar Ray Xulu Stadium, eClermont, enyakatho-mpumalanga yeTheku izolo ngeSonto, uNobhala-jikelele we-YCLA, uMnu Mluleki Dlelanga, ushiye angalazi egxeka uZodwa Wabantu ethi akasona isibonelo esihle kwabesifazane eNingizimu Afrika.
Kule rali iSACP ibixwayisa ngokubulawa nokuhlukunyezwa kwabesifazane nezingane. UMnu Dlelanga uthe sekuyisikhathi sokuba uZodwa Wabantu ayeke ukwehlisa isithunzi sabesifazane - ngemikhuba yakhe njengoba edansa agovoze.
Le ntokazi isanda kugila isampula iveza isitho sayo sangasese, izithombe zayo yenza lokhu zigcwele ezinkundleni zokuxhumana.
“Isithunzi sabesifazane sibukelwa phansi ngenxa yalo Zodwa Wabantu, ubukisa amadoda wonke aseNingizmu Afrika umzimba wakhe wonke. Sicela eze ehhovisini leYCL zingakapheli izinsuku eziyisi-7 ukuze simfundise ukuthi umuntu wesifazane uziphatha kanjani,” kusho uMnu Dlelanga.
Lo mholi uthe izenzo zabesifazane zokuveza izitho zabo zangasese, baphathe notshwala - njengoba kwenza uZodwa Wabantu - zikhubaza imikhankaso yokulwa nokuhlukunyezwa kwabesifazane futhi zehlisa nesithunzi senzalabantu.
UZodwa Wabantu ubesematheni kulezi zinsuku njengoba ebegubha usuku lwakhe lokuza- lwa endaweni yobumnandi iMashamplanez, eChesterville, entshonalanga yeTheku ebegubha khona iminyaka engama-33 edla anhlamvana.
Kulo mcimbi kunezithombe eziveza le ntokazi ishaya imidanso yayo kuvele isitho sangasese ime nenye ebidansa iveze amabele, kubonakala izingono.
Ethintwa yiLANGA uZodwa, uthe akabazi kwakubazi laba bantu (YCL) okukhulunywa ngabo, wathi yena ngeke akwazi ukushintsha ubuyena futhi usehlukunyezwe kakhulu ezinkundleni zokuxhumana.
“Kangibazi laba bantu okhuluma ngabo, kungcono bangibize ngelinye ilanga ngiyophatha umcimbi (wabo) ngoba ngeke ngikwazi ukushintshela bona.
“Sengibizwa ngesifebe manje yingenxa yabantu abafana nabo laba abaqhamuka sebegxeka nje. Baningi abantu besifazane abahlukunyezwayo la ngaphandle mabahlukane nami.
“Mina ngijabulisa abantu ngithole imali, bona nje mabathule mhlawumbe kabangazi kahle,” kusho uZodwa Wabantu.