INGASE ILAHLEKELWE NGUMQEQESHI I-PIRATES
IBHOLA: Usikazwa ukutakula iBafana kweye-Afcon
I-ORLANDO Pirates ingase izithole isithungatha umqeqeshi njengoba kuvela ukuthi iSouth African Football Association (Safa) ihlela ukweshela uMilutin “Micho” Sredojevic ukuba azoyitakula kulolu sizi ebhekene nalo.
IBafana yenze edume ngakho ihlulwa wukungena emqhudelwaneni weNdebe yoMhlaba ozokuba ngonyaka ozayo eRussia ngesikhathi iguqiswa yiSenegal ngo-2-0 ngoLwesihlanu ebusuku ePeter Mokaba Stadium, ePolokwane.
ISenegal yiyona engene ishishiliza kule midlalo yomhlaba njengoba iqhwakele kwigroup D.
IBafana isiyogcina icala njengoba izobhekana neSenegal emlenzeni wesibili ozokuba kusasa ngoLwesibili ngo-21h30 kulona leliya lizwe.
Emuva kwalo mdlalo uBatxer kulindeleke ukuba athumele umbiko wale midlalo emibili bese enika nezincazelo zokuhluleka kwelakuleli ukuya eRussia.
ILANGA lithole ukuthi kunezikhulu zeSafa ezingasayizwisisi kahle eyokuthi uBaxter aqhubeke nomsebenzi. Kubikwa ukuthi zikhala ngokuthi kaluvuthiwe kahle ukhakhayi lwakhe ekuqeqesheni iqembu lesizwe. Kusolwa kakhulu izinqumo azenze kulo mdlalo wangoLwesihlanu kanjalo neziholele ekutheni elakuleli lihlulwe kabili yiCape Verde Islands.
Kuthiwa kunezikhulu ngaphakathi kwiSa- fa ezifuna kungathathwa amashansi ngoBaxter emidlalweni yokuhlungela i-Africa Cup of Nations (Afcon). Zifuna agudluzwe. Kuthiwa zifuna kweshelwe uSredojevic owenze izimanga ecija i-Uganda. Uhanjiswe kuyona wukuthi ubebuye asebenze engaholi.
“Kuhlukene imibono ngaphakathi kwiSafa ngodaba lukaBaxter, kukhona abafuna adedelwe manje kube khona abathi makayekwe aqhubeke nemidlalo yokuhlungela i-Afcon. Igama eliphakanyiswayo ngelikaMicho ngoba unesipiliyoni semidlalo yaseAfrika uma eqhathaniswa noBaxter.
“Kodwa into engase ivimbe wukuthi uBaxter uma exoshwa uzohamba netshe lemali njengoba kwenzeke ku-Ephraim “Shakes” Mashaba obengumqeqeshi weBafana.
"Kungenzeka kugcine kuqhutshekwe noBaxter ngoba uzisholo yena ukuthi uma eke wahluleka wukufaka elakuleli emidlalweni ye-Afcon uzoqhela.
"Okubuhlungu wukuthi uma engangeni kule midlalo kusho ukuthi uzoqhela ashiye elakuleli lingadlalanga emiqhudelwaneni emibili emqoka,” kusho umthombo osipotshozele lolu daba.
Imizamo yokuthola uDanny Jordaan onguMengameli weSafa ukuba aphawule ngalolu daba iphunzile njengoba ucingo lwakhe beluvaliwe.
OlukaDennis Mumble oyisikhulu esiphezulu seSafa nolukaDominic Chimhavi wezokuxhumana kule nhlangano bezikhala kodwa zingabanjwa.