Bagqugquzela ukuthengwa kwekaZuma
EZEPOLITIKI: Bathi kakukho mnumzane ozophatha yedwa la
UNOBHALA-JIKELELE weSouth African Communist Party (SACP), uDkt Bonginkosi Emmanuel “Blade” Nzimande, ugqugquzele abantu ukuba baphume ngobuningi babo bayothenga incwadi esematheni, emayelana noMengameli Jacob Zuma, ebizwa ngePresident’s Keepers, ebhalwe wuqweqwe lwentatheli ewumazulazayithole, uJacques Pauw.
Lokhu ukwenze izolo ngeSonto ngesikhathi ethula inkulumo eralini yeSACP eyaziwa ngeleRed October, ebiseSugar Ray Xulu Stadium, eClermont, enyakathontshonalanga yeTheku.
Lo mholi osanda kudliwa yizembe ekubeni ngungqongqoshe wezemfundo ephakeme, ungene kwachwaza inkundla ehambisana noMnu James Nxumalo oke waba yimeya yeTheku, nguNobhala-jikelele weYoung Communist League of South Africa (YCLSA) uMnu Mluleki Dlelanga noMnu Solly Mapaila oyiphini lesibili likanobhala-jikelele weSACP.
Leli qembu belihlangene ngaphansi kwesiqubulo esithi “Stop Gender Vilonce, Abuse & Killing”. UDkt Nzimande ungene ngesiqubulo esithi “Phansi ngokudilizwa, phansi!” ekhala ngokuthi kunendoda eyodwa ekwazi ukushintsha izinto kodwa uma kukhankaselwa i-African National Congress (ANC) edla lugqokweni lunye neSACP, basuke bebonke.
“Buka iqembu baliphihliza ka- buhlungu kanjani. Simatasatasa ngapha silwela izwe lethu kodwa umnotho uphethwe ngamaGupta. Abantu mababuke, izinto zizojika ngempela. Isimo sezwe kwezomnotho kasisihle, abantu kumele bazi ukuthi i-ANC yethulwa yiSACP kwiSoviet Union, ngiyaxakeka namhlanje uma izinto sezinje.
“Uyalala ekuseni uyavuka izinto sezishintshile, yini ngempela? Kungenxa yendoda eyodwa nje engathi yayikhankasa yodwa thina singekho, kakukho mnumazane oyedwa ozophatha la, sizozijika izinto, thulani nibheke,” kusho uDkt Nzimande. Unxenxe abantu ukuba bayothenga iThe President’s Keepers wathi yilapho bezobona khona izimfihlo okumele bazazi. Ugxeke izakhiwo zikahulumei ezingasanakwa wathi umnotho ushayeka kakhulu uma zingasekho izinto ezifaka imali ezweni.
Ukhwele wadilika kubaphathi bakwaSouth African Broadcasting Corporation (SABC) wathi bathatha izinhlelo bazinike inkampani yakwaMultichoice.
Kukuyona le nkundla futhi lapho uDkt Nzimande abegxeka khona uMnu Thabo Mbeki ngowezi-2009, ekhankasela uMengameli Zuma ehambisana nabanye abaholi okubalwa kubona uMnu Jeff Radebe noMnu Julius Malema osekuwumlando ukuthi usheshe walehla ihhashi likamengameli - wasungula i-Economic Freedom Fighters (EFF) nabanye abaholi iningi labo abebekwi-ANC Youth League (ANCYL).
Lapho uDkt Nzimande ukhale ngokuthi bebephuma emihlanganweni ebiholwa nguMnu Mbeki bejuluke bemanzi te ngoba ubenguzwilakhe, engayithathi imibono yabo. UNobhala-jikelele weYoung Communist League of South Arica, uMnu Mluleki Dlelanga, uthe isikhathi soshintsho sesifikile eNingizimu Afrika.
Inkundla beyichwaza ngokwedlulele uma kubonakala uMnu James Nxumalo oke waba yimeya yeTheku abantu bememeza igama lakhe sakudonsa.
Bebuphume bonke ubuholi beSACP buzokweseka lo mcimbi. Phakathi kwabo kubalwa uNobhala weSACP KwaZulu-Natal uMnu Themba Mthembu, uMnu Jacob Mamabolo ongunobhala waleli qembu eGauteng, usihlalo walo eGauteng uMnu Joe Mpisi umgcinimafa walo KwaZulu-Natal uNkz Nomarashiya Caluza, nesekela likasihlalo KwaZulu-Natal uNkk Nomvuzo Shabalala.