KUBHEDILE EMCIMBINI WOKUBUKA IBAFANA
WEHLULEKILE wukudonsa abantu umcimbi obuseMoses Mabhida People's Park eThekwini ngoLwesihlanu lapho bekubukwa khona umdlalo weBafana Bafana neSenegal kubhazabhaza kamabonakude.
Lo mcimbi obekungenwa ngamathikithi abiza u-R120 kugcine kufike izimeywa nabezindaba kuphela njengoba abantu abebethenge la mathikithi bebengabonwa nangalukhalo.
Kulo mcimbi bekuboshelwe oDJ abayizintandokazi uDJ Tira wodumo lwengoma eshisa izikhotha kulezi zinsuku esihloko sithi “Malume” noDJ Fresh (osesithombeni) ongumsakazi we-Metro FM ongaconsi phansi kubathandi bomculo we- house.
Phakathi kwezimenywa kulo mcimbi kubalwa nezinkakha ezanqoba umqhudelwano we-Afcon ngo-1996 okubalwa kuzo uLucas Radebe, Doctor Khumalo, Phil Masinga, Mark Williams nabanye.
Izinhlelo zemidlalo oKhozini neMetro FM bezisakazelwa bukhoma kule ndawo. Izimenywa ziphume zidangele ngemuva kokuba iqembu lesizwe likhale ngaphansi ngamagoli amabili eqandeni.
Nakuba abantu abebethenge amathikithi bebengabonwa nangalukhalo kodwa labo DJ bakwazile ukwenza abadume ngakho ukuklwebha amapuleti bejuxuzisa labo abakwazile ukuphumelela.