Ufuna ubulungiswa umndeni kamufi
Abasolwa bayazichanasela
UFUNA ubulungiswa umndeni wakwaSithole oNdini, enyakatho yeKwaZulu-Natal, okudutshulwe kwabulawa indodana yawo ngoZibandlela (December) wangonyaka odlule njengoba abasolwa abane ekufeni kwayo bengaphandle.
Lo mndeni ukhala ngokuthi kabenziwanga ubulungiswa ngoba abasolwa babanjiwe kanti ngesikhathi esanda kubulawa uMnu Sizwe Sithole, amaphoyisa aye noyedwa wabasolwa kwaSithole, wakhomba lapho bengene khona ngesikhathi behlasela.
UMnu Sithole kubikwa ukuthi ungenelwe ngabasolwa phakathi kwamabili enomkakhe, wadutshulwa kwathathwa imali elinganiselwa ku-R40 000.
Ngokusho kwelunga lomndeni wakwaSithole - elingathandanga ukudalulwa - bekunengxabano phakathi kukaMnu Sithole nomunye wesilisa wasendaweni, obejwayele ukusebenzisa izimoto zikamufi - okubikwa ukuthi ubenezimoto eziningana impela.
Lithi lona wesilisa utsheleke imoto kanti uzoyishayisa eMtubatuba, ogwini olusenyakatho yeKwaZulu-Natal - kanti emuva kwesikhashana kuzobe sekudutshulwa umufi.
“Lo mfana nguyena ofike nabangani bakhe bahlasela lapha ekhaya, kasikwazi ukuhlala sijabule ekubeni ababulali sibabona behleli ngaphandle ngoba na- ngesikhathi kwenzeke le nto, amaphoyisa afikile ephethe ucwazi omnyama obunemali ethathiwe, asitshela nokuthi asebabambile abenzi bokubi. Sidumalile uma sesibabona begcogcoma ngaphandle abasolwa,” kusho leli lunga lomndeni.
Kuthiwa ngesikhathi abasolwa begasela kwaSithole, umufi ubone kukhanya ithoshi endlini okuthe uma evuka eyoqalaza wazithela phezu kwenganono.
Ngokuthola kweLANGA, izigilamkhuba lezi ziphoqe inkosikazi kamufi ukuba izimboze, ingazibheki, ikhiphe yonke imali ekhona endlini.
I-National Prosecuting Authority (NPA) ikhiphe incwadi ethi idokodo livaliwe ngenxa yokuthi kakukho okuyamanisa abasolwa naleli cala okwamanje, okusho ukuthi akekho ozoshushiswa ngalo.
Inxuse umndeni ukuba ukhiphe obunye ubufakazi nezincwadi ezifungelwe ngokulandelwa kwemibandela yomthetho.