Iyihlazo eyomfundisi oxoshelwe elekhafula
IYASHAQISA into eyehlele umfundisi waseSheshi eWestern Cape, ogcine ephelelwe wumsebenzi wokuhola izimvu zeNkosi ngoba ekhononde ngokubizwa ngekhafula nguzakwabo emsebenzini weNkosi, okuthe uma engasizakali wathatha udaba waluyisa eNkantolo yezoKulingana.
UMfu Brian Stephen, ompisholo, ubizwe nguzakwabo, “umshumayeli” Trevor Kordom ngekhafula. NgoNtulikazi (July), inkantolo ivune uMfu Stephen yayalela uMshumayeli Kordom ukuba axolise esidlangalaleni, akhokhe no-R5 000.
Kube uyinyathele emsileni uMfu Stephen ezikhulwini zaleli bandla elike laholwa nguMbhishobhi Omkhulu uDesmond Tutu kodwa manje eseliholwa nguMbhishobhi Omkhulu Thabo Makgoba - ngokuyisa udaba enkantolo, yize eveza ukuthi uzamile ebandleni.
UMbhishobhi Raphael Hess weDayosi yaseSaldanha Bay umbhalele incwadi ethi akazimisele ngokumnika ipherishi azolihola ngoba uqome ukuntantatheka wayisa udaba lwakhe enkantolo, wangalandela izindlela zokuxazulula izinkinga zangaphankathi ebandleni.
UMfu Stephen uthi okumphathe kabuhlungu kakhulu wukuthi ihhovisi likaMbhishobhi Makgoba lalile ukuzihlanganisa nalolu daba. Kuvela ukuthi indaba iqale ngowezi-2010 ngesikhathi uMfu Stephen eba yi- rector ye- perish laseSt Joseph the Worker, eBishop Lavis, khona eWestern Cape. Uveza ukuthi ozakwabo emsebenzini weNkosi bebevame ukuthi uma bekhuluma naye noma ngaye bathi “umfundisi omnyama” noma “umfundisi ongum-Afrika”.
Uthi omunye wozakwabo uke wathi: “Inkinga yakho (Stephen) wukuthi kawuyiqondi impilo yamakhaladi”. Ngowezi-2013 uMshumayeli Kordom umbize ngekhafula nokho wabuye waxolisa. Ngowezi-2016, utshelwe ngomunye uzakwabo ukuthi uMshumayeli Kordom wansondo usaqhubeka nokuthi uma ekhuluma ngoMfu Stephen ambize ngomfundisi oyikhafula.
UMfu Stephen ulubikile lolu daba kuMbhishobhi Hess, yena belu lo ongasafuni ukumnika i- perish azolihola. Kuyadabukisa ukuthi isihlava sokucwaswa kwabantu ngokwebala sigeleza ngisho nasemithanjeni yamabandla lapho okumele ngabe kushunyayelwa ubumbano nothando. Lokhu kwenza sizibuze ukuthi kanti lo nkulunkulu okhonzwa kuleli bandla eWestern Cape ngonjani uma abantu bezocokofulwa ngok0buhlanga kodwa izikhulu zalo ziwuhlabe inhlali kuthi uma umuntu esedlulela kwenye indawo angasizakala kuyona bese enqanyulezwa. Indlela izikhulu zaleli bandla okuvela ukuthi zilusingathe ngayo lolu daba, yenza singabaze ukuthi ziye kulo msebenzi ngenxa yezwi leNkosi. Kungasijabulisa ukuthi ihhovisi loMbhishobhi Omkhulu uMakgoba lilubhekisise lolu daba. Baningi abantu abampisholo abangamalunga aleli bandla, abakhokha izimali beya ezinkonzweni, abanikelayo ukuze bona laba babhishobhi abafana noMbhisbhobhi Hess bahole. Isenzo sikaMshumayeli Kordom nobhululu bakhe senza sicabange ukuthi bona bazibona bengcono phambi kukaNkulunkulu kunabantu abamnyama. KwaMbhishobhi Hess, ukhombise ukungabi ngumholi kulolu daba, kusho ukuthi naye uyahambisana nesenzo sikaMshumayeli uKordom sokucokofula uMfu Stephen ngokobuhlanga. Siyazi futhi siyaqonda ukuthi bakhona abezinye izinhlanga ababathandayo abantu abampisholo futhi abangabafela kodwa isenzo sabaholi bamaSheshi eWestern Cape, senza sizibuze ukuthi ngabe abantu kabenziwa nje iziwula kuthiwa babizelwa eNkosini kanti kuyohlekiswa ngabo. Esontweni sicabanga ukuthi yiyona ndawo okumele ngabe izinto zenziwa ngendlela enobulungiswa hhayi le nto yokuba kuthukwe umuntu kuthi uma ekhononda ashaywe indiva besekuthi uma edlulela phambili kuqalwe kukhulunywe eyezinhlaka zangaphakathi.
Kasibugquqguzeli futhi kasibufuni nalapho buhambe khona ubuhlanga ngoba akekho umuntu ozikhethelayo ukuthi ufuna ukuzalwa emndenini oyiliphi ibala. Bekufanele abantu baseWestern Cape abahluzile emakhanda basukume balwe nokuhlukunyezwa kukaMfu Stephen - kungakhathelekile ukuthi bamhlophe, baphuzi, babomvu noma baluhlaza - ngoba vele lesiya sifundazwe sekukaningi kukhalwa ngezigameko zobuhlanga ezibhekiswe kwabampisholo. INingizimu Afrika yakhiwe yizinhlobo ezahlukene zabantu okumele ezinye izinhlanga zikwamukele ukuze ibe yizwe esiziqhenyayo ngalo. AmaSheshi ewonke, bekumele azinuke amakhwapha ngalesi sigameko, le nto yehlisa isithunzi sebandla elibalwa namadala futhi ahlonishwayo eMhlabeni jikelele.