Ningashicileli izinto ezingamaphutha
MHLELI: Kunento ebuhlungu eyenziwa yiNkatha kubantu la eNquthu, futhi ngeze ngakweshwama uma ungalulandeli lolu daba ngoba ngiyalingeka ukusho ukuthi uyazwelana nayo.
Ngike ngathinta udaba lukaMabilabila (Kunene - iMeya yaseNquthu) eyohubhuza amanga emsakazweni womphakathi Ukhozi FM nawe wayishicilela leyo nto.
Ake ngikwazise nje noma ungabuzanga, kusasinda kwehlela ngisho ukulungisa ipayipi eNondweni, sekuyizinyanga ezintathu kuya kwezine sisokola. Omunye nje umhlola wethu la kuwadi 5, ikhansela layo belu iNkatha lizihlalela le eGlencoe abantu behlupheka.
Ngagcina umhlangano walo mhlawumbe ziyisi-9 kuNcwaba (August) kophezulu, namhlanje sikuLwezi (November).
Ngiqonde ukuthi Mhleli, ungashicileli into eyiphutha ngoba uzokwenza silingabaze leli phephandaba.
Impendulo: Siyabonga ngokusibhalela kwakho Mashobane kodwa-ke ungavumeli izilingo ngenxa yezingkinga okhala ngazo.
Kuyasidida ukuthi kungani ulingeke ekutheni ILANGA lizwelana neNkatha kodwa ube usho ukuthi uMnu Kunene uhubhuze amanga emsakazweni uKhozi naleli phephandaba laluschilela lolo daba?
Besingajabula ukuba usitshele usuku nenyanga esishicilele ngalo lolu daba okhuluma ngalo ngoba uma uzokhononda, ukhombe abanntu ngenjumbane kodwa kube kukhona izimbobo enkulumeni yakho, uzokwenza abakulalele balingeke bakubone udlala ipolitiki enkundleni engafanele.
Yeka ukulingeka Mashobane, sizolulandela udaba - yize singenaso isiqiniseko sokuthi ukululandela kwethu kuzozilungisa yinizinkinga okhala ngazo ngoba phelasicabanga ukuthi uma intuthuko ingayi empakathini
kusuke kufanele kubhekiswe ekhanseleni, uma-ke liyinkunzi enenkani noma lihambela kude okwelanga lasebusika njengoba usho nje ukuthi lizihlalela kude nomphakathi eliwuholayo, licetshwa kumasipala walo, uma kuhluleka lapho, ukhona uMnyango wezokuBusa ngokuBambisana nezoMdabu KwaZulu-Natal - oholwa nguNkk Nomusa Dube-Ncube - uye ungenelele komasipala abadlala ngomphakathi, kwesinye isikhathi ufake umlawuli uma kufanele.
Neqembu lalo ikhansela linamandla okulikhulula uma lingakwenzi elikhethelwe ukukwenza, ungaliceba nakulona.
Kasizwa Mbulazi ukuthi uke wakhononda kumasipala nasemnyangweni ngalezi zinkinga - okuyizona zindawo ezingasiza ziqhamuke nesixazululo.
Sizocela uxhumane nathi obhalweninyazi (e-mail) oluthi sazim@ilanganews.co.za ukuze silekelelane ukulandela udaba lwakho. Mzilikazi!