Isexwayiso kubagijimi ngeDorothy Marathon
EZOKUGIJIMA: I-KZNA ithi lo mjaho kawukho emthethweni
KUKHISHWE isexwayiso esishubile esibhekiswe kubasubathi ngomjaho iDorothy Nyembe Marathon ohlanganise i-10km ne-5km ohlelelwe ukuba ngeholide lomhla zili-16 kuZibandlela (December) eDundee.
IKwaZulu-Natal Athletics (KZNA) eholwa nguSello Mokoena onguMengameli igcizelela ukuthi lo mjaho kawukho ngaphansi kwayo, ngakho abazobamba iqhaza kuwona bangakhaleli le nhlangano uma kwenzeka kuba khona izinkinga abahlangabezana nazo.
Kuthiwa abadidiyeli balo mjaho sebeqalile ukukhipha amaphepha okuwukhangisa kubasubathi. Kuthiwa bawubiza ngokuthi ngo- wokuzibekisela isikhathi sokubamba iqhaza kwiComrades Marathon yangonyaka ozayo ezokuba mhla zili-10 kuNhlangulana (June) isukela eMgungundlovu isongwe eMoses Mabhida Stadium, eThekwini. Izingqwele zeDorothy Marathon kuthiwa zizohlomula ngo-R50 000 kwi-marathon kube ngu-R10 000 kwi-10km.
I-KZNA ithi kayivumelananga nabadidiyeli balo mjaho. Nokho kuthiwa imininingwane ngawo isisabalele nasezinkundleni zokuxhumana kanti kuthiwa abasubathi babhalisa ubuthaphuthaphu.
Lokhu sekwenze ukuba iKZNA yenze isicelo kubasubathi ukuba bangabi yingxenye yawo ngoba ekugcineni bazobuyela kuyona uma beba nezinkinga. I-KZNA ithi isike yaba nezinkinga lapho abasu- bathi bekhalela yona uma sebenezinkinga. Ithi lokhu kwenzekile kwi-All Africa Marathon, iViking, umjaho wasoPhongolo nakowaseMzinyathi.
Phambilini owazibiza ngomzukulu kaDorothy, uNkosinathi, wathi lo mjaho uzokuba khona iKZNA ivuma noma ibachitha. Wathi uninakhulu udume umhlaba wonke njengoba ebalwa nabalwela inkululeko yakuleli. Ethintwa izolo uNkosinathi, ucingo lwakhe belukhala lungabanjwa.
UProdigal Khumalo weMaxed Elite Athletics uhlelele abasubathi baKwaZulu-Natal iLong Run yebanga lika-60km, 50km no-40km ngeSonto kusuka ngo-5 ekuseni eStella. Le Long Run kuthiwa izokube ihamba emzileni weComrades Marathon kanti inhloso yayo wukucija abasubathi abazobamba iqhaza kulo mjaho omkhulukazi wakuleli.
Abafuna ukuba yingxenye yalo mjaho bangaxhumana noMakhosi Mhlongo kwethi: 073 065 7753 noma uKhumalo kwethi: 060 496 6781. Bayacelwa abasubathi ukuba bafone ukuzibekisela indawo.
USipho Mbanjwa weBoxer Athletics Club noJenet Mbhele woMzimkhulu Striders babe yizingqwele zeGreater Edendale 10km izolo ngeSonto eMgungundlovu. Kulo mjaho ohlelwe yiComrades Marathon Association (CMA) uMbanjwa uqophe isikhathi esingu-32:00 eshiya ngemizuzwana eyisi-6 uSilindile Gubese kwathi u-Anele Dlamini walala isithathu.
UJenet ushaye intambo ngesikhathi esingu-37:18 evule igebe lekhilomitha kuThobile Mkhize owenze u-40:18 kwathi uMakhosi Mhlongo wenza u-40:36.
Isiyonke imiphumela yeGreater Edendale 10km ihambe kanje, kwabesilisa: 1.Sipho Mbanjwa 32:00, 2.Silindile Gubese 32:06, 3. Anele Dlamini 32:50, 4.Leratsa Matekase 33:07, 5.Msawenkosi Mthalane 33:28, 6.Nkululeko Ngubane 34:39, 7.Nomore Mandivengerei 34:44, 8.Sibusiso Ndlovu 34:45, 9.Siphokuhle Tshoba 34:47, 10.Ayanda Mncube 34:50.
Kwabesifazane: 1.Jenet Mbhele 37:18, 2.Thobile Mkhize 40:18, 3. Makhosi Mhlongo 40:36, 4.Mkhize Bathole 42:13, 5.Nokukhanya Memela 44:29, 6.Mandisi Ngubane 46:27, 7.Aziwe Mtheku 46:49, 8. Sukhile Gumisa 47:38, 9.W Nyawoza 47:55.