URhoo ugxeka "ubuthongo" kungqongqoshe
Ukhala nangezinga lebhola eliphansi kwiPSL
UMAKADEBONA kunobhutshuzwayo waseNingizimu Afrika, uLucas “Rhoo” Radebe, ugxeka ukungabi noNgqongqoshe wezemidlalo ophapheme akholwa wukuthi kunomthelela ekubozeni kwezikwati zakuleli.
IBafana iguqiswe yiSenegal ngo2-0 kowokuhlungela iNdebe yoMhlaba ngoLwesihlanu ebusuku ePeter Mokaba Stadium, ePolokwane. Ukuhlulwa kweBafana kuqede amathuba ayo okuya emqhudelwaneni weNdebe yoMhlaba ozokuba seRussia ngonyaka ozayo.
URadebe uthi siyabonakala isikhala sikaFikile Mbalula obenguNgqongqoshe wezemidlalo, osengowamaphoyisa manje.
Njengamanje uNgqongqoshe WezeMidlalo wakuleli nguThulas Nxesi obukeka engenawo umdlandla wezemidlalo.
“UNgqongqoshe uMbalula ubekubona ukubaluleka kwezemidlalo, ubephapheme kangangoba ubehlale ebakhuthaza abezemidlalo kanti manje kakusabonakali lokho.
"Kodwa-ke okwenzeke kwiBafana kufanele sidlule kukhona siqale manje silungiselele okuzayo,” kusho uRadebe.
UMickey Modisane wezokuxhumana emnyangweni kaNxesi, uthe: “UNgqongqoshe unqume ukufaka umfutho omningi kwezokuthuthukiswa kwezemidlalo emazingeni aphansi kubalwa nengqalasizinda (okwenza angagqami).
"Sifuna ukulungisa umonakalo owadalwa wuhulumeni wobandlululo.
"Silwa nanokungasaphazi imali ngezinto ezingekho mqoka njengoba sesivale nokuklomelisa abavelele kwezemidlalo ngezimoto ukuze leyo mali isebenze ukuthuthukisa imidlalo. Nokho ngicabanga ukuthi uRhoo ubezincokolela nje ngokumfanisa noMbalu- la owake wabiza iBafana ngezahluleki.”
URhoo ube eseveza nezizathu akholwa wukuthi yizona ezenza abadlali bakuleli bangahlangani kahle ensimini.
“Into ebulala abadlali bamanje wukuthi kabasazinikele, benjalo nje kababumbene. Ngesikhathi siyiqembu langowe-1996 ukuzwana kwethu bekungaphezulu kokudlala ndawonye, besizwana ngisho singaphandle kwasenkundleni.
"Uma singadlali besivakashelana ukuze kuhlale kunomoya wokuzwana obewenza sikwazi ukulwelana uma sesisemdlalweni.
“Abadlali bamanje kabasakwenzi lokho.
"Umuntu uzenzela okwakhe kabasenandaba nobumqoka bokumela izwe. Thina namanje sisavakashelana, sisazwana ngoba lowa moya wokuzwana usekhona kawusoze waphela,” kusho uRadebe onqobe inkomishi yeAfrica Cup of Nations (Afcon) neBafana ngowe-1996.
Uphinde waveza ukuthi kumqoka kubadlali bakuleli ukuba bayoqinisa ukhakhayi ngokudlala phesheya.
“Konke kukumuntu ukuthi ufunani, ungadlala lapha ekhaya kakunankinga kodwa kumqoka ukuyoqinisa ukhakhayi phesheya. Ukudlala ngaphandle kwenza uqine, ukwazi ukumelana nobunzima bamanye amazwe ngoba usuke uwazi. Izinga lePSL (Premier Soccer League) ngokudlala ngeke ulifanise nelaseEurope. Yebo ngiyavuma imali ikhona kuleli kodwa izinga lokudlala lisephansi kakhulu (kwiPSL).
“Mina angidlalanga isikhathi eside kuleli, ngidlale kusukela ngowe-1991 ngahamba ngowe-1994, ngabe sengiyodlala iminyaka eli12 e-England.
" Kungisize kakhulu ukudlala phesheya ngoba ngifunde okuningi engibuye ngazokusebenzisa ukusiza iBafana Bafana,” kusho uRadebe.
URadebe ukhuluma kanjena nje ngokuya phesheya, cishe iningi labadlali besikwati esinqobe i-Afcon badlalile e-Europe.
UJohn “Shoes” Moshoeu, uHelman “Ncane” Mkhalele, u-Eric Tinkler badlale eTurkey, uRadebe, uMark Fish, u-Andre Arendse, uShaun Bartlett noPhilemon Masinga badlale e-England kanti uMasinga ubuye wadlala nakwamanye amazwe njengase-Italy ukubala nje abambalwa.