UFAKE ISICELO SOKUKHULULWA KWI-BUCS
UMDLALI we-Orlando Pirates obengaconsi kubalandeli bale kilabhu kuvela ukuthi ufake isicelo sokukhululwa ngemuva kokubona ukuthi akekho ezinhlelweni zikaMilutin “Micho” Sredojevic ongumqeqeshi omusha weziMnyama.
ULuvuyo Memela (30) ( osesithombeni) odlala ophondweni lwesokunxele phambili kwiBucs, uke waba yisithandwa sabalandeli bale kilabhu edlala ingcwenga yebhola futhi eshaya namagoli amqoka.
Nokho selokhu kufike uSredojevic isikimu usizwa ngendaba njengoba edlalisa uThabo Qalinge noThembinkosi Lorch.
Ubuye achibiyele ngoMpho Makola noThabo Rakhale.
Leli phephandaba lithole ukuthi uMemela ufake isicelo sokuba iBucs imkhulule kumbe imubolekise uma sekuvulwe iwindi lokudayiselana ngabadlali ngoMasingana (January) wonyaka ozayo.
Kuthiwa usekhathele wukusebenza kanzima ejimini kodwa angafakwa esikimini uma sekuyodlalwa.
Leli phephandaba libuza uFloyd “Jomo” Mbele oyiMenenja-jikelele yeBucs ngalolu daba, ume ngokuthi izindaba ezithinta izinkontilela zabadlali beBucs kabazinekeli abezindaba, yinto yangaphakathi.
Uthi wumthetho obekwe kudala ongeke ushintshe.