AmaZulu azomema iMadrid eThekwini
NGITHANDA ukwazisa abalandeli bethu ukuthi uhambo lwami lwaseSpain luzoletha olukhulu ushintsho ekilabhini jikelele.
Eqinisweni bengihambele ekomkhulu lakwaJoma okuyinkampani esixhasa ngezimpahla zokugqoka ngemuva kokukhala kwabalandeli bethu ngokuntula izinto zekilabhu.
Nokho ngizithole sengishaya izinyoni ezimbili ngetshe elilodwa njengoba uhambo lwami luzale ubudlelwano neReal Madrid okuyikilabhu ebalwa namakhulu emhlabeni.
Ngivakashele eSantagio okuyikomkhulu leMadrid. Ngichazekile ngengikubone khona. IMadrid noSuthu banokuningi okufanayo njengoba womabili la makilabhu enegazi laseNdlunkulu.
Ngihlela ukuthi sibe nomdlalo wobungani neMadrid engifisa udlalelwe eThekwini.
Kuningi esizokuncela kule kilabhu edlalelwa yizibabuli zabadlali abadume umhlaba wonke. AbakwaJoma basithembise ukuthi sizomemezela ngezinhlelo ezikhona.
Sizodalula okuningi ngoMasingana (January) ngomhlangano wami omqoka nabakwaJoma.
Kuningi esizokuzuza kule nkampani ngoba iJoma iyinkampani yesithathu kwezinkulu emhlabeni ezixhase unobhutshuzwayo njengoba kuhamba phambili iNike ne-Adidas ukubala nje ezimbalwa. Uhambo lwami lwaseSpain lube luhle kakhulu ngoba kangigcinanga ngokuxhumana neReal Madrid kuphela, ngikwazile uku- hlangana ne-Atletico Madrid neAthletic Bilbao okungamakilabhu amakhulu eSpain.
Yize ngingeke ngiyikhulumele eziko, okunye ukuxhumana esiphezu kwakho ngokweSwansea City yase-England neVillareal yaseSpain. Nginesiqinisekiso sokuthi ngelinye ilanga la makilabhu ayogcina efikile eThekwini ukuzodlala eyobungani noSuthu.
Lokhu kuzoletha izinto eziningi ezinhle eThekwini naKwaZuluNatal. Ukuza kwale midlalo kuzodayisa iTheku kwezokuvakasha okuyinto ezosimamisa umnotho. Abadlali bethu bazothola ithuba lokubonwa ngamakilabhu amakhulu ase-Europe okuzosiza iBafana Bafana. Engosini yami eyedlule ngibalule ukungenami kwethu ngesenzo sokuthi umkhandlu wethu weTheku uthathe isinqumo sokuxhasa iKaizer Chiefs ukuzocindezela thina emdlalweni weTelkom Knockout.
Ngenhlanhla enkulu ngemuva kwale ngosi ngikwazile ukuhlangana noZandile Gumede oyiMeya yeTheku okhombise ukusizwa isikhalo sethu. Izingxoxo zethu neMeya zihambe kahle kakhulu futhi uthembise ukuthi kukhona azokwenza ukusiza amakilabhu aseThekwini adlala kwiPremier Soccer League (PSL).
UGumede ukhombise ubuholi obukhulu esinika ithuba lokuxoxisana naye futhi ngingakusho ukuthi izingxoxo zihambe kahle kakhulu, kukhona esizokumemezela ekuhambeni kwesikhathi nokudlala eMoses Mabhida Stadium. Sinomthwalo omkhulu wokudayisa iTheku kubantu bokuhamba.
Kasisho ukuthi kubi ukuthi iTheku libambisane neChiefs, kodwa kumqoka ukuthi uhulumeni wethu abambisane nathi ikakhulukazi uma sibhekene namakilabhu angaphandle.
Sifisela uCavin Johnson ongumqeqeshi wekilabhu unwele olude njengoba ebezalwa ngempelasonto esiphuma kuyona.
Sifisela unwele olude u-Ayanda Mkhize osithungathela abadlali naye obeshadelwa nguJabu Ngcobo ngoMgqibelo esiphuma kuwona. Siwumndeni woSuthu sibafisela impumelelo yodwa.
HEBE! USUTHU! HEBE!