KUSOLWA ISINYAMA KUSTEVE KOMPHELA
Banxusa uKaizer Motaung ukuba amgeze ngoba akamxoshi
BASOLA isinyama kuSteve Komphela ongumqeqeshi weKaizer Chiefs abalandeli bale kilabhu njengoba bekholwa wukuthi ngeke inqobe lutho uma engakhishwa sona ngoba ayifuni ukumxosha.
IChiefs iphinde esidume ngakho iwashiswa ijezi kwi- semi-final yeTelkom Knockout yiBidvest Wits iyiguqisa ngo-1-0 ngoMgqibelo ntambama eBidvest Stadium, eGoli.
Igoli okunqobe ngalo iWits lingqofelwe enethini nguJames Keene ngomzuzu wama-28.
IChiefs iqede lo mdlalo ingasaphelele kukhishwa ngekhadi elibomvu uWiseman Meyiwa odlala esiswini.
IziMpofana ziye kulo mdlalo ziyizimfivilithi kwazise zisefomini kulezi zinsuku kanti iWits idonsa ngodizili.
Nokho ziphoxe abalandeli bazo abebephume ngezinkani ukuzozeseka, bahamba bejabhile.
Omunye wabalandeli bokuqina beChiefs ocele ukuba igama lakhe lingadalulwa ngoba unobudlelwano obuhle nekilabhu, uthi benozakwabo basola ukuthi uKomphela unesinyama okufanele akhishwe sona uma kuwukuthi le kilabhu izimisele ngokuthatha inkomishi ngale sizini.
“UKomphela siyamthanda impela futhi ikilabhu isiqala ukudlala kahle ngaphansi kobuholi bakhe kodwa izinkomishi ziyamphika.
"IChiefs idume ngokuba nenhlanhla kodwa lokhu okwenzeka manje kuyacaca ukuthi ngumqeqeshi onesikhwakhwalala okufanele ayokhishwa sona ukuze ziphinde ziqonde izinto ekilabhini.
"UKaizer Motaung ongusihlalo weChiefs ungumuntu omnyama uyazazi lezi zinto akangazenzi impumputhe, uKomphela udinga ukuyokhishwa isikhwakhwalala ngoba abafuni ukumxosha.
"Le nkomishi bese siyibalile ngendlela ebesiza kahle ngayo kuyona kuyethusa ukuthi siphumile, akukholakali,” kusho lo mlandeli ogcizelele ukuba lingadalulwa igama lakhe.
UKomphela emuva komdlalo uzwakalise ukuphatheka kabi ngesimo asibona senzeka kubalandeli bale kilabhu.
“Abalandeli beChiefs ngiyabathanda futhi ngiyabahlonipha.
"Kungiphathe kabi ukubabona bephuma enkundleni bedumele ngaleya ndlela.
"Yisimo esingamukeleki lesi kodwa bekungaphezu kwamandla ethu ngoba bese sishoda.
"Abafana bami benze konke okusemandleni yize bese sishoda kwanqaba yona inhlanhla. Bakwenze konke obekufanele bakwenze saphikwa ngamathuba esiwakhile. Kodwa zizolunga izinto ithemba alibulali,” kusho uKomphela.
UGavin Hunt ocija iWits uzwakale engeneme yize ezakhe seziyogijima kowamanqamu.
“Umdlalo wethu awuzange ube muhle besinganikani ibhola ngendlela ebengibayalele ngayo abadlali bami.
"Kodwa-ke anginandaba kangako nokuthi siya kowamanqamu bengizojabula kakhulu ukube bekungamaphuzu amathathu esiwatholile ngoba sisendaweni embi kwilog.
"Ngifuna kuphele unyaka sesisukile kule ndawo embi esikuyo angiphathekile kahle emoyeni,” kusho uHunt.