Injabulo kuxoshwa uRobert Mugabe
Ubanxenxa ukuba babuyele eZimbabwe
INCOME yabongela iZimbabwe African National Union - Patriotic Front (Zanu-PF) ngokuchitha uMengameli Robert Mugabe obesehlale esikhundleni sokuhola leli qembu nezwe iminyaka engaphezu kwengama-36 iZimbabwe Communist Party (ZCP). UNobhala-jikelele weZCP, uMnu Ngqabutho Mabhena, utshele ILANGA ukuthi bayethemba ukuthi isinqumo seZanu-PF sizoshintsha izinto kuleliya lizwe, ikakhulukazi kwezomnotho.
Unxuse abantu baseZimabwe ukuba babambisane ukuze leliya lizwe libuyelwe wudumo nokuhlonishwa ebelinakho emhlabeni phambilini.
“Uma sibambisene, singasilungisa isimo sezwe. Kumele sisebenzele ukuba intsha ithuthuke kwezomnotho, ithole imisebenzi. Kubo bonke abantu baseZimbabwe abangekho khona, masibuyele ekhaya siyosebenzela ukubuyisa isithunzi sezwe lethu, ukuze nezivakashi zibuyelwe yithemba, kuthuthuke isimo sethu sezomnotho. Nokho kulele kwiZanu-PF ukuba izinto zihambe kahle, kumele isebenzisane namaqembu aphikisayo.
“Uma ike yavalela ngaphandle abanye abantu ngeke kubelula ukuba izinto zilunge,” kusho uMnu Mabhena.
UMnu Mohubetshwane Mashilo, okhulumela iSouth African Communist Party (SACP), uthe ukuketulwa kukaMnu Mugabe kuwumphumela weminyake eminingi.
“Isimo esikhona eZimbabwe kasidalwanga nje kuphela yizinkinga zabantu bakhona kodwa nanezinhlangano zangaphandle.
“IZimbabwe yizwe elizimele, okwethu kakukhona ukuba sithi kumele kube ngubani okufanele ahole leliya lizwe kodwa kumele nje sizwelane nabantu bakhona ngosizi ababhekene nalo,” kusho yena.
Uthi kuningi okungafundwa yiNingizimu Afrika kokwenzeke kuleliya lizwe kanjalo nalo kuningi elingakufunda kuleli.
“Nathi kudala sithi uMengameli Jacob Zuma makehle esikhundleni ngoba izinto kunokuba zibe ngcono, ziba zimbi kakhulu eNingizimu Afrika,” kusho uMnu Mashilo obelokhu egcizelele ukuthi indaba yokuholwa kweZimbabwe kumele iyekelwe kubantu bakhona baqoke umuntu abamthandayo ngokulandela imithetho yakhona.
UMnu Mugabe lidume lamthatha izolo ngeSonto kwamenyezelwa uMnu Emmerson Mnangagwa - obexoshwe nguyena lo mholi nezethenjwa zakhe kwesokuba yisekela-mengameli, waze wahamba eZimbabwe ngoba kuphendlelwa uNkk Grace Mugabe ukuba ahole leli qembu ngenhloso yokuba akwazi ukuhola izwe - ubekwe njengomengameli wesikhashana waleli qembu.
UNkk Mugabe osekuwumlando ukuthi iNingizimu Afrika imdedele kwangaba ndabazalutho emuva kokushaya alimaze uNkz Gabriella Angels wakuleli ngentambo yeayina, ukhonjwe indlela kuleli qembu.
Lishone elayizolo uMnu Mugabe esesulile kwesokuba ngumengameli wezwe.
UMnu Mugabe ungomunye wabaholi base-Afrika obesekucaca ukuthi uyophuma ngebhokisi esikhundleni sokuhola izwe njengoba eqale ukulihola ngoNdasa (March) we-1980 ethatha umbuso kuMnu Ian Smith weRhodesian Front - emuva kokuba iqembu lakhe lisize iZimbabwe ukuba ithole inkululelo.
Kulaba baholi kubalwa uGnassingbe Eyadema waseTogo ohole kusukela ngowe-1965, oshone eminyakeni embalwa eyedlule. Emuva kokushona kwakhe kungene indodana yakhe esikhundleni sokuhola izwe.