Ubhekene nomqansa unina wokhubazekile
Udinga indawo engcono
UFISA ukwelulelwa isandla ngosizo lwendlu endaweni entsha unina wowesilisa ongakwazi ukuhamba nokukhuluma. UNkz Nobuhle Dumakude, ongunina kaMnu Mthabisi Dumakude (19) waseMevamhlophe eMpangeni, enyakatho-mpumalanga yeKwaZulu-Natal, uthi indawo abahlala kuyona yenza umsebenzi wokunakekela indodana yakhe ube wumqansa ongakhwelwa mbongolo.
Uthi umuzi abahlala kuwona - okungowelunga lomndeni wakubo - usendaweni eyintaba, kayinawo umgwaqo oqondile ongenela kuyona.
“UMthabisi uphathwe yisifo sokuwa esemncane kakhulu. Kuthe eseneminyaka emine ubudala, wakhubazeka wangakwazi ukuhamba nokukhuluma. Ngiphoqekile ukuyeka etohweni ebengilibambile ukuze ngimnakekele kahle.
“Manje ngoba usemdala, ngiyabona ukuthi isimo siya ngokuba nzima - kakulula ukumnakekela. Uma kufanele siye emtholampilo kuba wumzukuzuku ukufinyelela emgwaqweni omkhulu. Kuye kudingeke ukuba ngimbelethe ngoba nesihlalo sakhe esinamasondo kasikwazi ukuhamba endleleni yesintu, yimbi kakhulu.
“Ngifisa uxhaso lwendlu entsha endaweni ezokwazi ukuhlangabezana nezidingo zakhe ngoba usemdala, uyangisinda uma ngimbelethile. Ngize ngibe novalo lokuthi ngelinye ilanga ngiyoshelela ngimwise,” kusho uNkz Dumakude.
Uthi nokuba bayaphila, babonga usizo lwabafundi baseQhubandaba Primary School ababizwa ngeSoul Buddies, abaphume bengena bemfunela usizo lokuthola umazisi kaMthabisi okuholele ekubeni ahole imali yesibonelelo sikahulumeni sabaphila nokukhubazeka.
“Zangisiza lezi zingane nothisha wazo uMnu Nathi Majozi. Ngohlelo lwabo lokungenelela kubantu bomphakathi abadinga usizo olwehlukene, indodana yami ikwazile ukuthola umazisi, yase ibhalisela imali yesibonelelo sikahulumeni.
“Lesi sibonelelo siyawenza umehluko omncane ngoba siyalixosha ikati eziko, ikakhulukazi njengoba sobabili sithembele kusona. Kasanele nokho ukuba sisitholele enye indawo ezokwenza isimo sibe lula, yikho nginxusa noma ngubani ongakwazi ukufaka isandla ukuba asisize,” kusho uNkz Dumakude.
UMnu Majozi ophethe iSoul Buddies, ukuqinisekisile ukuthi isimo sakwaDumakude kasisihle neze. “Sibazamele nabantwana okungangamandla ethu. Osekusele manje yilolu sizo lwendlu. Silazisisile ikhansela ngalolu daba lathembisa ukuthi lizozama kodwa manje ngoba siyazi izinto zamakhansela zibuye zithathe kude, besifisa ukuthi nanoma ngubani ongakwazi ukwelula isandla enze njalo ngoba lesi simo kasisihle neze,” kusho uMnu Majozi.
Ikhansela lendawo, uMnu Thamsanqa Mathe, livumile ukuthi liyalwazi udaba lwalo mndeni, lathi lihambile layowubona ezinsukwini ezimbalwa ezedlule.
“Njengamanje ngisahlanganisa umbiko engizowethula emkhandlwini ukuze kubonakale ukuthi kalukho yini usizo abangaluthola,” kusho uMnu Mathe.
Ngifisa uxhaso lwendlu entsha endaweni ezokwazi ukuhlangabezana nezidingo zakhe ngoba usemdala, uyangisinda uma ngimbelethile. Ngize ngibe novalo...