UKWEXWAYISWA NGEZIMFUNDISO ZAMANGA
KUNEMPIKISWANO enkulu phakathi kwabakholwayo ngendaba yokuthi isekhona yini indawo yomthetho njengokuloba kukaMoses ekukholweni kwangemuva kukaJesu.
Le mpikiswano iye isuswe yizindawana eziningana ekubhaleni kukaMphostoli Paul. Engifisa ukukhuluma ngayo namuhla yile ayibhalela abaseKolose.
KwabaseKolose 2:16 - 18: “Ngakho makungabikho muntu onilahla ngokudla nesiphuzo noma ngemikhosi noma ukwethwasa kwenyanga noma amasabatha, okuyisithunzi nje salokhu obekuzakuza; kepha umzimba ngokaKristu.
Makungabikho muntu onemuka umvuzo wenu, othanda ukuzenza othobile ekhonza izingelosi, ephike ngemibono yakhe, ezikhukhumeza ngeze ngengqondo yakhe yenyama. “Isihloko sale ntshumayelo yomphostoli sithi:
“Ukwexwayisa ngezimfundiso zamanga”. Kuyacaca lapha ukuthi umphostoli wayelungisa noma ephendula umbuzo owawubuzwe ngamakholwa akuleli lizwe ngokugxekwa ayekutholile ngokungagcini imithetho ethile emayelana nalezi zinto njengalokhu yayibekiwe emthethweni njengoba yayilotshiwe ngoMoses. Kuzoqapheleka ukuthi uPaul wayeshumayela ivangeli kwabezizwe, aba- benomthetho wabo ongafani nowakwaJuda.
Kuzokhumbuleka ukuthi abezizwe babathwalisa kanzima abaphostoli ngesikhathi befika nomthetho wenkolo okwakufanele abakholwayo bawugcine, ikakhulukazi owokusoka. Abaphostoli baze bahlangana emuva kwende impikiswano, kwaphoqeka ukuba abaphostoli abakhulu bathathe isinqumo esiwujuqu sokuthambisa umthetho. Lokho sikuthola encwadini yeZenzo 15.
Kusukela lapho-ke uMphostoli Paul wayeseshumayela ivangeli lokungagcinwa komthetho kodwa kukholwe kuJesu kuphela. Ziningi izinto azisho eziphikisa umthetho njengokuthi (umthetho) wabethelwa noJesu esiphambanweni.
Okufike-ke kuxake wukuthi kukhona imithetho noma izimiso yena azibeka emabandleni eziwumthetho wokuthi bawugcine. Kangifisi-ke ukukhuluma ngalezo zinto ngoba isikhala sincinyane. Ngiyafisa ukuphawula ngale nkulumo kaPaul KwabaseKolose.
Le nkulumo ingaba wukuthi abagcini bemithetho yezwe lakubo babebasola ngokuhlubukela enkolweni sebegcina imiyalo yenkolo noma yingoba babegxekwa ngamanye amakholwa ngokungayigcini imithetho yenkolo. Ake sivumelane ngokuthi wayethi mabangakhathazwa yilezi zinto ezibekiwe njengalokhu kuyaliwe emthethweni.
Uthi-ke mababambelele kuKristu bangabanaki ababagxeka ngomthetho ngoba wona wawuyisithunzi sikaKristu. Akesibuke le yesithunzi sokuzakuza. UNkulunkulu wabusisa u-Abraham nenzalo yakhe wayibutha, wababekela imithetho yobungcwele okuwukuthi imiyalo yombuso wezulu.
Kasinawo umlando wokuthi ngelinye ilanga kwakuyokuba khona uJesu ngaphandle kokuthi izizwe ziyobusiswa ngenzalo yakhe. Manje-ke le mithetho yayiyimigomo okwakumele bayigcine ukuze babengcwele. Kawukho nowodwa kuyona owawungagqugquzeli ubungcwele kangangokuthi kungathiwa oyigcinayo uqalekisiwe.
Manje-ke laba bantu babemcasula uNkulunkulu ngokwephula le mithetho, abashaye ngezindlela eziningi enye yazo okuwukufa uqobo. UNkulunkulu wagcina enqume ukuthi uzokwenza isivumelwano esisha nabaJuda ngoba kwakungabantu bakhe azikhethela bona wabangcwelisa.
Sizokhumbula ukuthi izindlela uNkulunkulu ayezisebenzisa ukunqanda aba-Israel ekwedukeni emithethweni yakhe, yayiguquguquka. Wababekela abehluleli wabanika abaprofethi, wabanika uJesu, ekugcineni wabanika uMoya Ongcwele. Konke lokhu kwakuwuku-
beka umbuso wezulu eMhlabeni. Manje-ke uma umphostoli ethi kwakuyisithunzi sokuzakuza ngiyamvumela ngoba kwakuwukulungisa abantu ukuba bawufanele umbuso wezulu owawuzofika noJesu. Izisekelo zalo wombuso wukugcinwa komthetho njengalokhu wayala uJesu; Mathewu 5:17.
Uma kuwukuthi uyamkhonza uKristu njengoba ebayalela lapha uPaul, kuwukugcina isisekelo sombuso wezulu, okuwukushiya izono nokweduka njengoba wayala uJesu ukuthi yena uze ku-Israel odukileyo.
Ukweduka-ke kusho ukuhamba ngendlela okungeyona ezokufikisa lapho osuke uyakhona. Nabo-ke abakwa-Israel babeduke ngenxa yokwephula umthetho ababekelwa wona. Yisono ukwephula umthetho kaNkulunkulu. Njengoba kuthiwa uJesu wafela izono zabantu yingoba wayengeke abekhona ukuba abantu kabonanga.
Manje-ke uma uJesu wayenguNkulunkulu, kusho ukuthi wayengumnikazi womthetho - yena uqobo engumthetho. Manje-ke uma yena wayenjalo kusho ukuthi wayengcwele kanjalo-ke nabakholwa kuyena noma nguyena, bakholwa entweni ephelele, kuyona okukhona ubungcwele obungenasono. uJesu uthi: “Ngakho-ke oweqa owodwa kule miyalo emincinyane, afundise abantu kanjalo, uyakuthiwa omncinyane embusweni wezulu; kepha oyigcinayo, ayifundise, lowo uyakuthiwa mkhulu embusweni wezulu” ngokukaMathewu 5:19 “.
Ngaphambi kokuba enyukele ezulwini, wabayala ukuba bafundise abezizwe konke yena abayale ngakho noma abafundise khona. Uma kuwukuthi-ke le ncwadi yoMphostoli uPaul isho ukuthi abakholwayo mabangabe besayigcina imithetho kaNkulunkulu, kayiphikisani yini nemfundiso kaKristu lo okuthiwa mabakholwe nguyena?
Ngikuhlonipha kakhulu ukushumayela komphostoli kodwa ngithola kunguyena yedwa oshumayela ivangeli lokungahloniphi izimiso ezamiswa nguKristu ukwedlula abaphostoli abahamba naye uJesu, okuyibona abafundisa uPaul ngevangeli likaKristu.
Ngifisa sibheke ukuthi abanye abaphostoli bathini ngomthetho emuva kukaJesu. Jobe 2:8; “Kepha uma nigcina umthetho wobukhosi ngokombhalo wokuthi: “Wothanda umakhelwane wakho njengalokhu uzithanda wena”. 2Petro 2:21 “Ngokuba ngabe kwaba ngcono kubo ukuba babengayazanga indlela yokulunga kunokuba kuthi sebayazile bafulathele umyalo ongcwele ababewunikeziwe”. 2 Petro 3:17; “Ngakho, bathandekayo, njengokuba nazi lokhu ngaphambili, xwayani ukuze ningadukiswa ngokukhohlisa kwabangenamthetho, niwe ekuqineni kwenu”. UJesu wayeyisithunywa sikaNkulunkulu sokwenza umbuso wezulu uphilwe eMhlabeni njengalokhu wayewunike u-Adam, ngakho-ke ngithi uma kuwukuthi isithunzi esiwumthetho sasiyisampula noma isithunzi-ke - njengoba kusho umphostoli - sokufika kombuso wezulu hhayi uJesu, ngiyavumelana naye.
Uma kuwukuthi kwakuyisithunzi sikaJesu, kusho ukuthi ngesikhathi ehamba eMhlabeni nombuso kanjalo wahamba. Kanti manje sitshelwa ukuthi uNkulunkulu uziqu zintathu, kwahamba uKristu kwafika uNkulunkulu uMoya Ongcwele oyohlala nathi kuze kube phakade. Siyambonga uShembe esiqwini sesihlanu ngesithunywa sakhe, iNkosi iMisebeyelanga (iNkosi Vela Shembe); “Isagila sogagane esibazwe uLanga phuma sikothe maqede wasithukusa emqubeni emzini waseThembezinhle, umuzi omncane ungeBhedilehema lakwaJuda” ukusinqanda ekwedukeni ebesesikukhona sithi sisebungcweleni kanti kasiseyisona ngisho isithunzi sabo.