Okwenzeke eZimbabwe kuyeza nakuleli
KUYADABUKISA ukuthi isifundiswa esinjengoMnu Robert Mugabe size simbiwa ngamapiki ukuba siphume esikhundleni sokuhola iZimbabwe African National Union - Patriotic Front (Zanu-PF) emuva kokuhliphiza umnotho wakuleliya lizwe iminyaka eminingi, saphoqwa nokuba sesule njengomengameli wakuleliya lizwe. Sibona iqembu lakhe libone emuva kwendaba ukuthi konke akuthembisile ngesikhathi ethatha lesi sikhundla, bekungamawuwa nje.
Kuzokhumbuleka ukuthi enkulumeni yakhe yokuqala ngqa ayethulele abantu baseZimbabwe mhla zizine kuNdasa (March) we-1980 , uMnu Mugabe - obematasatasa ehlohla isiqhwaga esiwumkakhe kubantu baseZi-mbabwe ukuba sihole iZanu-PF ngethemba lokuthi sizoba ngumengameli wezwe - wathi wuhulumeni ohlonipha umthetho kuphela onesibindi sokutshela izakhamizi zawo ukuba zihloniphe umthetho.
Nokho lo mholi ubengasenzi lokhu akusho. Ubahlukumezile abantu bakuleliya lizwe, amazwe anjengeNingizimu Afrika awuhlabe inhlali. NgoNhlangulana (June) nyakenye, uMnu Joseph Chakanetsa (28) ugwetshwe iminyaka emibili ebhadla ejele ngokunqamula ngeloli inhlabaluhide yezimoto zikamengameli Mugabe, wabhanselwa ngezinsuku ezingama-60 ejele ngokungami ngesikhathi onogada balo mengameli bemmisa.
Baningi abantu abgqunywe ejele ngezinto ezingathi shu abebezisho ngoMengameli Mugabe. Yize sikwazi futhi sikuqonda ukuthi kunezethembiso ezenziwa kubantu baseZimbabwe ngamazwe asentshonalanga mayelana nomhlaba kodwa obesekwenzeka kuleliya lizwe, kwenziwa nguMnu Mugabe neqembu lakhe leli eliphenduke indodakusuka, limxosha sekonakele okuningi, bekuhlukumeza abantu bakuleliya lizwe njengoba inqwaba yabo igcine ibalekele eNingizimu Afrika.
Sekuwumlando ukuthi ngesikhathi lo mholi efunga eNational Sport Stadium - phambi kwenhloko yamajaji, uGodfrey Chidyausiku - wathembisa ukuthi uzohlonipha umthethosisekelo wakuleliya lizwe futhi uzokwethembeka kubantu balo. Okwehlele uMnu Mugabe kumele kube yisifundo kubaholi baseNingizimu Afrika abacabanga ukuthi abantu bazovuma nje kalula ukufunzwa abaholi abathandwa yiqeqebana elithile emaqenjini abo.
Yize lokho kwenzeka kodwa liyofika eliyisilima - njengoba limficile noMnu Mugabe. Lesi simo sokungabi khona kozinzo eZimbabwe, senza sibe netwetwe lokuthi kakusensuku zatshwala sisibone kuleli ngenxa yezimo ezikhona kwezepolitiki. Ngeledlule abantu abaningi abathanda ezemidlalo bebekhala ngokuthi kwenziwa yini ukuba imidlalo yeNdebe yoMhlaba yoMbhoxo inikwe iFrance yize yona ibiyisingethe ngowezi-2007 kodwa leli ligcine ngowe-1995.
Umuntu obelindele ukuba amazwe ase-Europe angavuma ukuba le midlalo ize kuleli kulesi simo sezepolitiki esikhona eqenjini elibusayo, i-African National Congress (ANC) nakuhulumeni uqobo ubengazishayanga kahle izibalo. Ukushintshashintshwa kongqongqoshe sengathi yizinkomo zomlabalaba, kakuyona into encane emazweni aseEurope.
Isimo seqembu elibusayo esichaphazela uhulumeni njengoba umnotho wethu uhlaselwa wumkhuhlane usuku nosuku, senza sibe novalo lokuthi miningi imicimbi emikhulu esazolahlekela iNingizimu Afrika.
Amazwi kaMnu Senzo Mchunu ekhuluma neLANGA ngeledlule, athi uMengameli Jacob Zuma ugqugquzele ubuholi be-ANC KwaZulu-Natal - yize buchithiwe yiNkantolo eNkulu yaseMgungundlovu - ukuba bulidlulise icala kwazise ubona ukuthi bungalinqoba ngoba efuna ukuba buyovotela uDkt Nkosazana Dlamini-Zuma oke waba yinkosikazi yakhe engqungqutheleni ye-ANC ngoZibandlela (December), aveza isithombe sokuthi obekwenziwa nguMnu Mugabe kucishe kufane nokwenzeka lapha ekhaya.
UDkt Dlamini-Zuma ungumholi osezakhele igama ngezindlela eziningi futhi ongangatshazwa ngamagalelo akhe kodwa ukuthinteka kwakhe egameni likamengameli kwenza abantu asebesuthi nguyena (umengameli) babone sengathi uphendlelwa esokwengamela ngoba nakhu kufanele ahlale kusona bese emvikela kukhona konke asolwa kukhona. Uma i-ANC ingafundanga lutho kulesi simo seZanu-PF, kuyobe ngeke isafunda. Sibongela abantu baseZimbabwe kakhulukazi abagcwele kuleli ngokuba iZanu-PF igcine iqunge isibindi yamgudluza uMnu Mugabe.