Landela uShembe nobuNazaretha uzokhanyiseleka
MHLELI: Enhliziyweni yami ngicela ukuphawula ngezinto ezithile encwadini yomfowethu uMncube ayikhiphe ngoMsombuluko mhla zili-14 kuNcwaba (August) ngendaba kaShembe.
Ngizogxila nje emaphuzwini ambalwa awashilo ngoba ubeqondise kumfo kaShandu. Uthi uMzilankatha igazi likaJesu kalizihlanzanga izingubo zaba mhlophe. Mhlawumbe mangimvumele kulokho ngoba vele nalesi sihlabelelo asishoyo kasisho njengoba ebekile.
Futhi-ke nje la magama ashiwo lapha kawekho esihlabelelweni sesihlanu.
Ivesi elingase lincike kule nkulumo yakhe lithi “abathanda ukumlandela abazidele kuqala bangayesabi imiyalo ephelisa amandla”.
Lona-ke esikhuluma ngaye lesi sihlabelelo nguJesu ngoba uShembe wasifundisa ngobuNkulunkulu bukaJesu.
Manje-ke nginenkingana kule ndawo yokuthi kalizihlanzi izingubo zibe mhlophe ngoba iSambulo 7:13-14 sithi” Elinye lamalunga lase liphendula lithi kimi: ‘Laba abembethe izingubo ezimhlophe bangobani, bavelaphi, na?’
Ngase ngithi kulo: ‘Nkosi yami, nguwe owaziyo.’ Lase lithi kimi: ‘Laba yibo abaphuma osizini olukhulu, bahlanza izingubo zabo, bazenza zaba mhlophe egazini lewundlu’.”
Kangazi-ke noma leli wundlu okukhulunywa ngalo lapha yimvu yini, kakusiye yini uJesu. Thina-ke safundiswa ukuthi igazi lewundlu kushiwo igazi likaJesu. Maqondana nokuzalwa kukaShembe, uMzilankatha uzwakala elingabaza leli lizwi elazwiwa nguSitheya, uMaHadebe, ukuthi lalivela kuNkulunkulu.
Mzilankatha, masivume ukuthi ezimeni zombili sizwa ngabo abazali, kabukho ubufakazi obuphathekayo ngaphandle kokukholwa ukuthi kunjengoba kunjalo ngoba labo okukhulunywa ngabo bazikhombisa lezi zinto okwathiwa ziyokwenzeka ngabo.
Kawukho umgomo engiwaziyo obekiwe wokuthi izithunywa zikaNkulunkulu ziyozalwa ndlelani. Kusukela kuMose kuye kuJohan, kabazalwanga ndlelanye.
Maqondana nokufa kukaShembe, uMthiya akhuluma ngakho, endabeni yakhe kangikholwa ukuthi wayechaza ukuthi uShembe wafa wavuka njengoJesu kodwa uShembe wahlwithwa ubuyena ngenhloso yokumbonisa ubizo lwakhe kanti okukaJesu kwakuwukufa kokuthi ahambe eMhlabeni.
Ngifisa-ke singakuqhathanisi, uShe- mbe wahamba eMhlabeni ngokwemvelo. Uma ngiphawula nje jikelele ngalokhu okushiwo nguMzilankatha ukuthi yena wazi usindiso olweza ngoJesu, ngiyamvumela kodwa ngifisa ukumphosela inselelo yokuba engqondweni yakhe akwemukele ukuthi uNkulunkulu akusiyena owamaJuda kuphela, bonke abanenhlanhla nalabo abaveza izithelo zokulunga uyaziveza kubona.
Insindiso uJesu ayeyilethile yileyo yesivumelwano esisha uNkulunkulu asethembisa indlu ka-Israel; Jeremiya 31:31, manje-ke kule nsindiso ayishoyo uMzilankatha thina sinjengezingane “ezi-adopthiwe” ngoba yayingakhishelwe thina, eyethu-ke yilena eyafika noShembe ovumayo ukuthi nebala uJesu wayeyindodana kaNkulunkulu ethunyelwe esizweni sika-Israel.
Ngiyammema uMzilankatha ukuba akukhuthalele ukufunda le ngosi ethi “uShembe NobuNazaretha” ngoba ababhali kuyona sekukaningi bechaza ukuthi kungani behlobanisa uJesu noShembe imibuzo yakhe eminingi iyophenduleka.