Uyabakhinyabeza nabesifazane ushukela EZEMPILO:
NGOLWESIBILI olwedlule, mhla zili-14 kuLwezi (November) bekuwusuku lokuxwayisa ngesifo sikashukela emhlabeni. Kule ngosi sizobheka imiphumela yalesi sifo, ikakhulukazi ekuqedeni umdlandla wokwenza ucansi. Kulokho sibheka lo mphumela kwabesifazane okungavamisile ukuba kuxoxwe ngawo njengoba esikhathini esiningi kuvame ukuba kukhalwe ngawo kwabesilisa.
KUYINI UKUKHONDAMA NGOKOCANSI KOWESIFAZANE?
Uma ukwenza ucansi nesithandwa sakho kungasamthokozisi owesifazane onesifo sikashukela, ukukhondama kwemizwa yokulangazela ucansi kungenzeka kube yiyona mbangela.
Kuningi okuba nomthelela empilweni yezocansi kumuntu wesifazane onesifo sikashukela. Izinhlobo ezahlukene zengcindezi ziyakuthikameza ukwaneliseka kwezocansi. Umthamo kashukela osegazini odamane wehla wenyuka, ungaholela ezinkingeni eziwuthikamezayo umdlandla wokulangazelela ucansi. Ezinye zalezo zinkinga yilokhu okulandelayo:
Okwenzeka emzimbeni uqobo
Ukuncipha komswakama emgudwini wesitho sangasese kowesifazane, wukufadalala kwemizwa ekitaza kamtoti, wukungafinyeleli kuvuthondaba nobuhlungu obuzwayo ngesikhathi sokwenza ucansi - konke lokhu kuqeda ukulangazelela ukulwenza.
Ukuphazamiseka
Ushukela ndini lona uholela kwezinye futhi izinkathazo njengokuzizwa ukhathele ngokwedlulele, yisidingo sokujova, wukukhuphula umthamo we- insulin ngesimpompo ( pump) sakhona, wukwalusa izinga lawo ushukela osegazini, ukuba phansi nokuba phezulu kwawo kanjalo nesikhathi okusichithayo ukwenza lokho - sekuhlangene kuyayithikameza yonke into emayelana nokuzilungiselela ukwenza ucansi.
Izinkinga zesimo somqondo
Ushukela ungaholela futhi ezinkingeni zokomqondo njengokuphelelwa wukuzethemba nokuzizwa sengathi kawusabukeki kahle ngenxa yokuzimuka, ingcindezi yokubhekana nesifo esinge- lapheki, wukukhathazeka, wukuba nomzwangedwa nokuzizwa sengathi ungolahliwe.
Konke lokhu kuyayiphazamisa impilo yezocansi kumuntu wesifazane. Sekunobufakazi ukuthi le nkinga cishe ithe chithi saka kwabesifazane asebethe thuthu ngeminyaka yobudala - kodwa okungakacaci wukuthi ngabe lezi zinkinga zibangelwa wushukela ngempela yini.
Kulabo-ke esezibahlasele lezi zinkinga, bathola ukuthi zithikameza ukuxhumana kahle nezithandwa zabo. Owesifazane osemdala kungenzeka kungabe kusabalula ukuthola azothokozisana naye ocansini, lokhu kwe
ngeza imizwa yokuba se- ngathi ulahliwe.
Abasebasha bona lokhu kungase kubangele ukukhathazeka ngokuthi kazi basabukeka kahle yini na. Ukuzimuka-ke okwenezela kuleyo nkinga yokubukeka kabi, kudinga ukuba kulawulwe ngendlela efanele yokudla kanjalo nangokuzivocavoca.
Ukukhathazeka ngokuthikamezeka kobudlelwano
Maqondana naleli phuzu, ukuhlanganye- la kowesifazane ohlelweni olweseka ababhekene nale ngwadla kanjalo nokwazi ukuxhumana kahle nesithandwa sakhe, kungalekelela kakhulu empilweni yakhe yezocansi.
Okunye okukhathaza impilo
Kuba khona futhi nokukhathazeka kowesifazane ngokukhulelwa nokuhlela umndeni, ukutheleleka komgudu wesitho sangasese yizifo ezithile nemiphumela esuke ingaqondiwe edalwa yimishanguzo yokulawula isifo sikashukela - konke lokhu kungayithikameza impilo yezocansi yokumntu wesifazane.
IZABA ANGAZENZA NESITHANDWA SAKHE
Okunye kokumbalwa owesifazane angakwenza maqondana nalesi simo, yilokhu okulandelayo:
Gcina ushukela osegazini usezingeni elifanele ngakho konke okusemandleni;
Xoxa nesithandwa sakho nibambisane ekwenzeni ngcono ukuxhumana nokuzwana;
Kusobala ukuthi le nkinga inomthelela ekusebenzeni komqondo, ngakho thola usizo lukangoti wezengqondo;
Qiniseka ukuthi izinga likashukela nelamafutha egazini kusendaweni efanele; Yehlukana nokubhema ugwayi.
Umthombo ngabe:diabeteswellness.net