Uhambe emhlabeni ibambene ngezihluthu
UWUPHAKAMISILE umculo kamasikandi futhi baningi abaculi abakusho bangananazi ukuthi bangene kule ndima begqugquzelwa yisiphiwo sakhe. Ngikhuluma ngoSipho “Mahawukela” Mseleku (ongasekho) waseGubazi eNquthu, maphakathi neKwaZuluNatal, obenesiphiwo esimangalisayo. Upheke inqwaba yabaculi abanohlonze.
Le nsizwa ibihlonishwa kakhulu ngokushaya ingoma kanti umculo wayo ubuthakaselwa kakhulu. ILANGA likuxoxela kancane ngomlando wale nsizwa ebisiphendule umuzi wakwaMseleku ikhaya lomculo ngoba bekucula ngisho umshana wakhona (uKwakhe “Mgqumeni” Khumalo, iBhova likaDikadika) ngenxa yayo.
UMbhekiseni Mseleku noKhaya Mseleku bakubo, ngabanye leli phephandaba elixoxe nabo ukuthola kabanzi ngoMahawukela obedume ngeleGcokama. UMahawukela ubezihasha kanje: Ingulukudela engene Igulukudela endlini kwabo, Kwakhala izintombi Aziqomi ngoba zisaba unina. Igqomoza likapelepele, Ibhungu eligijime ngendlela Liyofuna amatshitshi ngaphe sheya komfula. Seziphinde zabuya ezeGcokama Awahambe amambuka Abuyele kubo kwambuka. Yahlaba ingungumbane Yaphinda yahlaba futhi nansi iminjunju!” UMahawukela kuthiwa ukhule kungakhombisi ukuthi unothando lomculo ngoba ubezishelela izintombi emakhaya, ezilusela nezinkomo.
Yize kunjalo kodwa bekuzwakala ukuthi uyakwazi ukucula uma nje ezivumela ingoma nezinye izinsizwa. Kuthe uma esesuka kubo eGubazi waya eGoli wafika wasebenza efemini.
Ngokuhamba kwesikhathi uhlangane noMabalisa Shange obekwazi ukudlala isigingci nenye insizwa yaseMachunwini eMsinga okuthiwa uMathawula - (engasekho). Baqale lapho basungula iqembu elibizwa ngoMahawukela noMathawula bekuyiminyaka ye-1980.
Basebenzile kwabe sekufika uHalabani Mchunu waseMsinga wajoyina iqembu basungula aMa
tshitshi Amhlophe ngowe-1993 nge-albhamu ethi “iSono”. Ngaleso sikhathi bese zibhekene ngqo ngeziqu zamehlo le nsizwa noShobeni Khuzwayo weZingane Zoma kwazise bese kuyiwona la maqembu ancintisanayo futhi ayesungulwe ngonyaka owodwa. UMahawukela uye kuShobeni wacela ukubolekwa uBongekile Ngobese (ongasekho) obecula eZinganeni Zoma, ethi ufuna ayosiza aMatshitshi Amhlophe ngoba bekukhona intombazane ebishonile kuleli qembu lakhe (aMatshitshi Amhlophe). Kuthiwa akaphindanga wabheka emuva uBongekile - inkampani yakwaGallo Records, uMahawukela abeqopha ngaphansi kwayo ivele yamsayinisa inkontileka. Ngaleso sikhathi aMatshitshi Amhlophe abenza ezibukwayo ezitolo ngokudayisa. Kusuke enkulu ingxabano phakathi kwabo - sekuyinkukhu nempaka - kwaze kwangenelela amakhosi abo ngoba bakhelene lwalungiswa udaba kodwa umndeni kaBongekile ubusuphumele obala wathi mayiyekwe ingane yawo isebenze lapho ithanda khona. Kube sekucaca ukuthi iZingane Zoma zisenkingeni. Ngaleso sikhathi aMatshitshi ashaye igolide yakhula kakhulu impi, uMahawukela wabe esesungula uBuhle Begubazi eshuthise uMbhekiseni noMansizwana bakwaMseleku ekhasethini. Nalo leli qembu lingene kwezwakala lingasavimbeki ezimbangini zalo.
Kuthe kusenjalo, wabuya ngelinye iqembu uMahawukela, uMlamu Wami. Lidayise amakhophi ayizi-50 000. Kulezo zinsuku kushone uMabalisa kwabe sekulandwa uFihlis'khwele Nzuke (ongasekho), wadlala intambo naye washona emuva kweminyaka embalwa.
Kuthe umbango usephezulu, uMahawukela waboshwa iminyaka elinganiselwa kwemibili esoleka ecaleni lokubamba inkunzi kanti amaphoyisa ambophe kungafanele, empeleni ayemphambanise noHalabani Mchunu okunguyena obefuneka ngenxa yokufana kwabo.
Uthe uma ephuma ejele wabuya ngelinye iqembu, iZinsizwa zakwaMseleku kodwa eculisa kulona uKhaya Mseleku. Usondeze noMuhle Khuzwayo (umshana wakhe). Emuva kokushona kukaFihlis'khwele kusungulwe Izintombi zikaMahawukela ezidume kakhulu ngengoma ethi “iMpama Impama”.
UMahawukela isigingci ugcine esesishayelwa nguMandla “Shwi” Xaba - kaShwi noMtekhala - kwialbhamu yaMatshitshi Amhlophe ethi “Isisho Sabadala” waqhubeka naye kuBuhle Begubazi kwi-albhamu ethi “Isiphithiphithi”, kuMahawukela nge-albhamu ethi “iLembe” nethi “iKhathonisenta” okuyiyona edume kakhulu njengoba idayise kahle impela.
Kula ma-albhamu uShwi ubecula indlela yokuqala, uMahawukela eshaya eyesibili - naseZintombini zikaMahawukela. Abasebenze noMahawukela bathi lesi sitayela abesidlala sifike noShwi kuyena ngoba ubekade edlala ushuni kaNgxalothi.
Ngowezi-2000, uShwi ushiyile kuMahawukela wayosebenzisana noShobeni. Ngaleso sikhathi uMahawukela ulande uKhanda Mseleku wayodlala intambo kanti uzoshona. UMbhekiseni Mseleku uthi bekunzima kakhulu emculweni kodwa babeyibamba ishisa. “Wonke la maqembu abehamba kahle kakhulu ezitolo nempi ibiphezulu kakhulu,” kusho
yena.
Emuva kokuba sekusungulwe iZinsizwa zakwaMseleku, uMuhle Khuzwayo nguyena okhulume noMahawukela ecelela uMgqumeni ukuba asondele emculweni athekele ngoba ubesesiyekile isikole.
Kuvela ukuthi nebala kwenzekile lokho kodwa iBhova liqale ukuculiswa eZintombini zikaMahawukela emuva kokuba uShwi esehambile. Ngonyaka wezi-2000, uMahawukela udutshulwe wabulawa eTembisa, eGoli - emini libalele ingakaphumi kwayona leyo albhamu yeZintombi zikaMahawukela.
Ngokusho komndeni, ukuhlaselwa kwakhe kumayelana nengxabano yabafana bakwaMseleku ngaphansi kwenkosi yakwaNtombela nabasoBengwane ngaphansi kwenkosi yakwaSithole eQhudeni - kuze kwabakhona abadlulayo emhlabeni kodwa bebelwa eNquthu.
UMahawukela udutshulwe nomfowabo uDumisani besathi bahlala phansi endlini obekuzohlanganelwa kuyona kuyolungiswa lo mbango obuqhubeka. Emuva kwalokho asale dengwane amaqembu akhe, kwabangiswana ngawo phakathi kukaMuhle noMgqumeni abebezalwa ngodadewabo bakaMahawukela.
Ngokuthola kweLANGA, baqhathwe wukuthi uMgqumeni uye kwaGallo wafuna incwadi yokuthi bakhulule amaqembu bese eba ngaphansi kwakhe. Kuthiwa uMuhle noMgqumeni bahubhane isikhathi eside ngezibhamu, kangangokuba ugcine eseboshwa uMuhle ebhadanywa ngamaphoyisa ehamba nenye insizwa yakubo bekhokhobela iBhova kwelinye ifulethi ebelihlala kulona.
Kuthe uma ephuma ejele, uMgqumeni waphucwa amaqembu aholwa nguMuhle ngokwesinqumo esithathwe wumndeni wakwaMseleku noNganeziyamfisa Ntuli (ongasekho), obeprojusa uMahawukela. La maqembu aqhutshwe nguMuhle waze wadlula emhlabeni ngowezi-2007. Abazali bakaMahawukela, uMnu Mshulubane Mseleku noNkz Matwayizi Sithole basadla anhlamvana.
Wonke la maqembu abehamba kahle kakhulu ezitolo nempi ibiphezulu...