Ikhuthaze ukunakekela imfuyo iNkosi uFodo
Bekunomjaho wamahhashi nemibukiso yengqephu
IHLABE ikhwelo yalibhekisa kwabezizwe iNkosi Lucky Fodo yaseMzimkhulu, eningizimu yeKwaZullu-Natal yathi mababuyise imfuyo yabampisholo ngoba iwumnotho abawunikezwa nguNkulunkulu ukuba baphile ngawo.
Lokhu ikusho ngoMgqibelo yethula inkulumo yayo eKilimon, e-Underberg ngesikhathi kunomjaho wamahhashi ogqugquzelwa wuMasipala wesiFunda iHarry Gwala, wuMnyango wezeMidlalo nokuNgcebeleka KwaZulu-Natal nabaxhasi iGold Circle, bicoastal Horse Care neRural Horse Riding Association.
INkosi Fodo inxenxe abantu bendawo ukuba banakekele imfuyo yabo ngoba iyikhambi lokuziphilisa kwabamnyama. Ikhombe ngenjumbane amasela emfuyo yathi umthetho kusafanele wenze isibonelo ngabantu ababoshwa ngamacala okuntshontsha imfuyo.
“Okungihlabe umxhwele kakhulu wukubona intsha iyingxenye yalo mjaho, okusho ukuthi usungenile kubantu ngoba konke esikwenzayo sikwenzela izizukulwane ezizayo ukuze zikwazi ukuziphilela ngale kokuba ziyotohoza,” kusho iNkosi uFodo.
Ethula inkulumo yakhe uNgqongqoshe wezeMidlalo nokuNgcebeleka KwaZulu-Natal, uNkk Bongi Sithole-Moloi, uthe lo mjaho usuyishintshile impilo yabantu ngokuyisa kule ndawo ingqalasizinda njengoba sekuthuthukiswe nendawo lapho amahhashi egijima khona. Uthe kulo nyaka umnyango uwuxhase ngemali elinganiselwa k-R 100 000 lo mjaho futhi bafisa ukwenza kangcono kunalokho.
“Inhlosongqangi yethu wukuthi okwenzeka emadolobheni sikwe- nze nasemakhaya njengoba sisazoqhubeka nokuthuthukisa le ndawo ngawo lo mjaho ukuze eminyakeni ezayo ube sezingeni elifana neleDurban July” kusho uNkk SitholeMoloi. ISekela-meya laseHarry Gwala, uNkz Ntuseng Duma, lithe bengumasipala bazoqinisekisa ukuthuthukiswa kwale ndawo okugijima kuyona amahhashi ngokuthi ibenezihlalo ezisezingeni eliphezulu.
Ihhashi elihambe phambili nguKhomputha waseMzinyathi, lithole u-R 10 000 ngokudla umhlanganiso. Lilandelwe yiNxakanxaka yaseMajuba ehambe no-R 8000, kanti uMajayivana yena ulale endaweni yesithathu. Ngaphandle nje kwezinkulumo namahhashi - njengakweminye imijaho yamahhashi - ingqephu ibidida unwabu. Lo mjaho ubalwa neminye eyelama iVodacom Durban July okuDundee July neNkandla May.