Ukushiya kukaButhelezi kusho ukulahleka kobuholi bethu
ISINQUMO sikaMengameli weNkatha Freedom Party (IFP), iNkosi Mangosuthu Buthelezi (uMntwana waKwaPhindangene) , sokuthatha umhlalaphansi ekuholeni iqembu nasekusebenzeni kwezombusazwe, kuyinselelo nesifundo enkundleni yombusazwe waseNingizimu Afrika. Lokhu kuyinselelo ngoba uhamba ngesikhathi lapho isizwe sakithi silangazela kakhulu abaholi abanobuqotho bezinga eliphezulu nobungangabazekiyo. UMntwana Buthelezi uzenzele udumo njengesazi sokubuswa kwezwe ngesikhathi ehola i-IFP iminyaka engama-42.
Ngelanga lokuvulwa ngokusemthethweni kwesizinda sakhe sokugcinwa kwamagugu nemibhalo ngoNcwaba (August) wezi-2015, ngathi: “Uphile impilo efanele nakanjani ukuba kushiyelwane ngayo ezizukulwaneni zamanje nezangomuso. Namhlanje ngihlanganyela nabanye ukuqinisa nokubonga iqhaza - wena njengomuntu nje uwedwa - oqhubeka nokulibamba ekwakweni intando yethu yeningi.
"Kungihlaba umxhwele ukwazi ukuthi lo mnikelo ngeke ushabalale kodwa uzolondolozwa kulesi sigcinamagugu ukuze kusizakale ngaso bonke abantu.”
Ukusebenza kwakhe kwezombusazwe kuhlanganisa nokuhlanganyela kwakhe nokubambisana kwakhe kwasekuqaleni neminye imibutho yenkululeko, ikakhulukazi i-African National Congress (ANC).
Kepha lobu budlelwano babuye banyundelwa kamuva, okwadala umphumela wendluzula KwaZuluNatal.
Izimpawu zakhe zobuholi obukhaliphileyo zahlala obala ngesikhathi elekelela ukuxazulula isimo, esebenza ngokuzikhandla nomholi we-ANC, uMnu Nelson Mandela (ongasekho) - ufeze ukuthula nokubuyisana esikhathini esifushane.
Ulwazi nobungcwepheshi bobuholi bakhe bekungeke kungabonakali ngemuva kokungena kwentando yeningi ngesikhathi umengameli weNingizimu ne-Afrika wokuqala wentando yeningi, uMnu Mandela, ayenesifiso esingaphumelelanga sokumbeka njengephini lakhe.
Ukubekwa kwakhe njengongqongqoshe wezangaphandle wokuqa- la wentando yeningi kunikeze iNingizimu Afrika elinye ithuba lokufunda nokuzuza ngolwazi nobuhlakani bakhe.
UShenge ube nemibono enamandla enkundleni yokubonisana ngesikhathi seConvention for a Democratic South Africa (Codesa). Imibono nokuzinikela kwakhe beyingekho indlela yokukuziba.
Ukusebenzela kwakhe abantu baseNingizimu ne-Afrika kuhulumeni wobunye besizwe ngokuzinikela, kufakazeleke ngesikhathi uMengameli Mandela embeka njengomengameli obambileyo esikhathini esithile.
Namhlanje, ukwehla kwakhe ezibopheni zobuholi kuyinselelo enkulu ezweni lakithi. Siyizwe elilapho kwahlukana khona izindlela. Sidinga ubungcwepheshi obunolwazi nobuhlakani obungasihola busedlulise kule nxushunxushu. Iqhaza lakhe emkhandlwini kazwelonke kakungabazeki ukuthi libe ngelinamasu, elinamandla, ubuzali lwafaka ugqozi.
UShenge ube yingxenye epheleleyo yokusombuluka kohlelo lwethu lwentando yeningi olunamaqembu amaningi.
Sethemba ukuthi uzoqhubeka ahlinzeke uholo ezinhlelweni za- ngomuso ezihambisana nentando yeningi.
Wenze umnikelo omkhulu maqondana nezindaba ezicindezelayo ezigqolozele izwe lakithi ezifana nokungaqashwa, ububha, ukungalingani, uhlelo lokuqhutshwa ko- khetho, ukuhlinzekwa kwamaqembu ombusazwe ngemali, ukubhidlika kwezimiso zombuso, uma ngingabala okumbalwa nje.
Ukwehla kwakhe esikhundleni sombusazwe kuzoba wumbuzo onzima kubo bonke abezombusazwe ukuthi ngabe isikhathi sabo bona enkundleni yombusazwe ukhona yini umnikelo esiwenzileyo ekuqiniseni imigomo nezimiso abethenjwe ngakho ngabantu baseNingizimu Afrika.
Isifundo esikhulu esishiywa nguShenge ngesokuthi umphakathi udinga abaholi abakwazi ukuqhuba imigomo yabo eya phambili ngobuhlakani nangaphandle kokwesaba.
Ukufeza lokhu, abaholi kufanele bahlabe amehlo abo ngale kwemigomo eminyeneyo yamaqembu abo ombusazwe.
Impilo yoMntwana Buthelezi yezombusazwe, isifundisa ukuthi ukuze ube ngumholi onamandla, kakufanele ugweme isibopho sakho esizweni ngoba ufuna ukuchema neziqubulo ezingamagobongo angenalutho zokuzakhela ugazi oquqabeni.
Umntwana usedlulisela amatomu esibopho sobuholi esizukulwaneni sabantu abasha.
Inkundla yomhlaba wombusazwe iyaqhubeka nokuheha ukunakwa yintsha. Abaholi kufanele bakhe abaholi bangomuso abazothwala imigomo yesizwe nokuba bakwazi ukubhekana ngokugcweleyo nezindaba zezinga loquqaba.
Isizwe - ikakhulukazi eqenjini lakhe lombusazwe - kufanele sizisize ngokusebenzisa ubuhlakani bakhe ukuhola ukwakhiwa kwenxoza yesizwe eqatha.
Lolu holo lungatholakala esigcinenimagugu sakhe esiqukethe ulwazi olujulileyo sezingxabo zamasiko ethu nokuthi kusho ukuthini ukuguqulwa kwemiphakathi.
Kukho konke ukuhlangana kwami noMntwana waKwaPhindangene – noma ngabe kusePhalamende, ngezikhathi ayesuke ehambele ngazo eTranskei emzini kaMnu Mandela noma embusweni weSizwe samaZulu KwaZulu-Natal – ubelokhu engumuntu onamahlaya nomfundisi onogazi wenkambiso yomdabu, imikhuba namasiko. Nami bengisizakala ngqo nangokwami nje ezifundweni zakhe zamahhala.
Egameni lami nangokwesikhundla sami njengoMengameli weUnited Democratic Movement (UDM), ngifisela uShenge ukuphumula okumfaneleyo, ngifisela nozomelama okuhle kodwa.