Akalibonanga elidlalayo uGonya
Bamungqimuze ngemizuzwana eyisithupha
USIVIKELE ngempumelelo isicoco sakhe seWBO uZolani “Last Born” Tete wase-Eastern Cape ehlula uSiboniso “Tiger” Gonya waKwaZulu-Natal ngomngqimuzo womlalisaphansi ngomzuzwana wesithupha emzuliswaneni wokuqala empini ebingoMgqibelo ebusuku eSSE Arena, eBelfast, eNorthern Ireland.
Ngokomlando wesibhakela kuthiwa yimpi yokuqala esheshe ngalolu hlobo emhlabeni.
Impi ebiphethe irekhodi emhla- beni ngeyeWBO ebiphakathi kukaDaniel Jimenez owalahla phansi uHarald Geier ngomuzuzwana we-17 emzuliswaneni wokuqala.
Empini kaTete noGonya abaningi abayibonanga ngendlela esheshe ngayo kwazise uGonya uthole isibhakela esisodwa izinyawo zabheka phezulu wangabe esavuka.
Unompempe ubale kathathu nje kuphela wabona uGonya enganyakazi wabe esethatha isinqumo sokuyimisa impi.
Kube sekuphuthuma abosizo lokuqala abazame ukusiza uGonya obebukeka sengathi uhanjelwe yingqondo, kodwa uphume esezihambela eringini ebonakala ukuthi udidekile.
Kuyiwe kule mpi uTete oqeqeshwa nguMhikiza Myekeni noMpumzile Matyila evele eyimfivilithi kwazise ukujwayele ukulwa phesheya kwezilwandle kanti uGonya weLudonga Boxing Promotions kaThulani “Nkunzi” Magudulela noZwi, ubelwa impi yakhe yokuqala e-Europe.
UGonya ongowokuzalwa eMtubatuba uye kule mpi ekleliswe waba ngunombolo 2 emhlabeni kwiWBO Inter Continental ngemu- va kokuba ebukise ngo-Immanuel Naidjala waseNamibia ngoMbasa (April) khona belu eNamibia.
Bekungokwesibili uGonya ehlulwa ngumshayisibhakela wase-Eastern Cape njengoba eke wahlulwa nguThabo Sishwane ngamaphuzu kanti okumehlele izolo kubukeka kuzomehlisa kakhulu ukuzethemba kwakhe.
Ongoti bezesibhakela bathi leli bhokisa kufanele litholelwe abazoliluleka ngokomqondo ukuze lingalahlekelwa wukuzethemba bese abaphathi balo belitholela impi elula ukuze libuyelwe wukuzethemba.