USIZWE UKUNGENELELA KWELANGA UMTHEMBU
KUSIZE ukungenelela kweLANGA mayelana nodaba lokungayitholi imali engu-R30 000 uBongumusa Mthembu ( osesithombeni) athenjiswa yona nguMasipala wangakubo iHarry Gwala ngokunqoba iComrades Marathon yanonyaka eqale eThekwini yasongwa eMgungundlovu.
Ngemuva kokuba uMthembu enqobe iComrades iHarry Gwala imethembise ukumklomelisa ngoR30 000 emcimbini okwakumenywe kuwona uDkt Nkosazane Dlamini Zuma, uMengameli weAthletics South Africa u-Aleck Skhosana noweKwaZulu-Natal Athletics (KZNA) uSello Mokoena.
Kuthe ngokuhamba kwesikhathi lo msubathi engawutholi umklomelo wakhe leli phephandaba labhala umbiko mayelana nodaba lwakhe.
Ngemuva kwalo mbiko umasipala usukumele phezulu wagcina umnika lo msubathi imali obumthembise yona.
IHarry Gwala ilithintile leli phephandaba ngeledlule ilazisa ukuthi isimnikezile uMthembu imali eyamthembisa yona.
Leli phephandaba lithinta uMthembu ukuqinisekisile ukuthi useyitholile imali athenjiswa yona wuMasipala wabe esedlulisa okukhulu ukubonga kubo bonke abafike nalo mbono wokuba aklonyeliswe ngokunqoba kwakhe.
UMthembu uqhube wathi kuzokuthi ngenyanga ezayo abe eseqala amalungiselelo eComrades Marathon yowezi-2018 ezokuba mhla zili-10 kuNhlangulana (June) isukela eMgungundlovu isongwe eMoses Mabhida Stadium, eThekwini.
Kuzokhumbuleka ukuthi kuqopheke umlando emjahweni wangonyaka ozayo lapho isibalo sabasubathi abayizi-20 000 abazobamba iqhaza kuwo sigcwale ngezinsuku ezingama-23 kuvuliwe.
Kuthiwa baningi abasubathi abasale ngaphandle emjahweni wangonyaka ozayo kwazise amaphepha okubhalisela abengakaphumi bekubhaliswa kuphela kwiinternet.
Kwenzeke okufanayo nakwiTwo Oceans Marathon ezokuba ngempelasonto yePhasika evulwe mhla lulunye kwephezulu kodwa kwavalwa ngosuku lwesibili kuvuliwe. ITwo Oceans yebanga lika-56km igijinywa ngabasubathi abayizi-11 000.
Ngemuva kwalo mbiko umasipala usukumele phezulu...