OWAMANQAMU WE-TKO UZODLALELWA ETHEKWINI
ITHEKU liphinde lagixabezwa ngomdlalo wamanqamu weTelkom Knockout phakathi kweBidvest Wits neBloemfontein Celtic ozokuba ngoMgqibelo womhla zimbili kuZibandlela (December) ngo-18h00 ePrincess Magogo Stadium, KwaMashu.
ICeltic ifinyelele kowamanqamu ngokuguqisa iPolokwane City ngo-4-3 wamaphenathi emuva kokuba umdlalo uphele kungu-1-1 esikhathini esengeziwe. IWits ihlule iKaizer Chiefs ngo-1-0 ngoMgqibelo eGoli. Ukulethwa kowamanqamu weTelkom eThekwini kwelama ukudlalelwa kuleli dolobha kowamanqamu weMTN8 phakathi kweSuperSport United eyahlula iCape Town City eMoses Mabhida Stadium, eThekwini.
Kuzo ezemidlalo yamanqamu, iSuperSport ithole igoli elimqoka lasekuhambeni iguqiswa yiTP Mazembe ngo2-1 emlenzeni wokuqala weCaf Confederation Cup izolo eDemocratic Republic of Congo (DRC). Umlenze wesibili uzokuba ngoMgqibelo ngo-20h15 eLucas Moripe Stadium, e-Atteridgevillle, ePretoria. Kulo mdlalo iSuperSport ibulawe nguRonwen Williams ovuzise amagoli kungafanele. Igoli leSuperSport lishaywe nguSipho Mbule ngomzuzu wama-47 kanti aweMazembe abhakuziswe ngu-Adama Traore ngowe-18 noDaniel Adjei Nii ngowama-67.
Imiphumela yemidlalo yeNFD imi kanje: Stellebosch 2, Jomo Cosmos 2; Super Eagles 1, Cape Town All Stars 0; Leopards 2, Mthatha Bucks 0; Pretoria University FC 0, Ubuntu Cape Town 0; UThongathi FC 0, Highlands Park 1; Royal Eagles 0, Real Kings 2; Mbombela United 3, Tshakhuma Tsha Madzivhandila 0; Richards Bay FC 0, Witbank Spurs 0.