Kungenelele owe-Arrows kolweSAB eThekwini
Kuxazululwe olwemidlalo yokuhlungela iMotsepe League
KUNGENELELE isikhulu seLamontville Golden Arrows odabeni obeluyinzukazikeyi lweManzimtoti Academy ephuma ohlangothini lweHoy Park neMageba Warriors ehamba nohlangothi lwaseCurries Fountain.
ILANGA lihoshe ngemithombo yalo enamandla ukuthi emhlanganweni wamakilabhu agijima kwiSAB eThekwini obubizwe nguKwenzakwakhe Ngwenya oyiNhloko yesikhashana kaSAB League ngoLwesithathu namakilabhu adlala kulesi sigaba kusize uGordon Masondo obemele iLamontville Golden Arrows okuthiwa uqhamuke nombono kwavunyelwana ngawo.
Kuthiwa uMasondo uncenge uLindani “Mantayi” Shezi weManzimtoti ukuba ehlise umoya ayidedele iMageba iqhubeke nokudlala ukuze ibhola libe nokuthula ezifundeni. UShezi uvumile. IMageba Warriors isizodlala ne-X1 Experience yasoGwini neFerry United yaseMsinga uku- khipha ikilabhu ezonyukela kwiMotsepe League.
Kuthiwa ukuqhathwa kuzokwenziwa maphakathi nesonto kanti kulindeleke ukuba le midlalo igijinywe ngoMgqibelo enkundleni engavuni kilabhu.
UNgwenya uthi kube kuhle kakhulu ukufinyelela esiphethweni ngalolu daba. Uthi ukufika kukaMasondo kube yisixazululo kakhulu.
“Siyazidinga izikhulu ezifuze yena. Sigcine sivumelene neManzimtoti Academy ekhombise ukubhekelela isifundazwe kuno- kubheka izifiso zayo. Yiqiniso ukuthi iMageba izomela iTheku.
"Nokho kuningi esivumelane ngakho kulo mhlangano njengoba sesinqume ukuthi wonke amakilabhu asuka kwiHoy Park neCurries Fountain abhalise abadlali ehhovisi elilodwa ekomkhulu leSouth African Football Association (Safa). Kahle kahle zonke izifunda zizobhalisa kwiSafa. Yindlela enhle kabi yokunqanda ukugcogcoma kwabadlali kuzo zonke izifunda.
Ogalakajane bazobanjwa ekuseni ngoba umazisi ukubeka obala ngomnikazi wawo ukuthi ugcine ebhaliswe kuyiphi ikilabhu ukubalekela umkhonyovu,” kusho uNgwenya.
Uphethe ngokuthi basazohlala phansi nekilabhu ezogcina ngokunqoba kweyokuhlungela ukungena kwiMotsepe League.
Uthi ngemuva kwemidlalo bazobhunga nekilabhu enqobile ngokumele kwenzeke.
Uthi babheke ukuthi le midlalo iqashwe ngelokhozi kwazise kabafuni kube nezikhalo ngekilabhu ezonyuka.