I-Iron Duke ihlela ukulanda uMkhwanazi
Ifuna ukuqinisa udonga lwayo
USIHLALO we-Orlando Pirates u-Irvin “Iron Duke” Khoza uhlela ukuqinisa udonga lwakhe lwasemuva ngesitobha seBidvest Wits okuthiwa uzimisele ngokushaya indesheni kubaphathi bayo ukuze bamudedelele sona.
IBucs izobhekana neLamontville Golden Arrows kusasa ngoLwesibili ngo-19h30 e-Orlando Stadium, eSoweto.
IBucs iya kulo mdlalo nje umqeqeshi wayo uMilutin “Micho” Sredojevic usanda kuphumela obala ukuthi udinga izitobha ngoba udonga lwakhe lwasemuva luyaxega.
Njengoba sekusele amasonto ambalwa kuvulwe iwindi lokudayiselana ngabadlali, leli phephandaba lithole ukuthi uKhoza uhlela ukuhlangana nabaphathi beWits ukuze imdedelele uBuhle Mkhwanazi odlala emuva oke wahlala isikhathi eside elimele.
Kuthiwa uKhoza ukholwa wukuthi uMkhwanazi angaba yisisombululo emuva njengoba bexega.
Imithombo yeLANGA engaphakathi kwiBucs ithi uKhoza njengoba ethule nje amakhadi akhe uwadlalela esifubeni.
"Uma sekuvulwe iwindi lokuda- yiselana ngabadlali angase asayinise abadlali abathathu abavutha bhe.
"Kubona kukhona ababili bangaphandle aseqalile ukuxoxa nabo.
"Ngakolunye uhlangothi uBernard Morrison liyamfimfa ikusasa lakhe futhi angase axoshwe ukuze kuvuleke uphawini wabadlali bangaphandle.
"Kuleli uhlela ukushela iWits imdedelele uMkhwanazi.
"UKhoza umthanda ukufa uMkhwanazi ubona engaba yisixazululo odongeni lwabo olubukeka luvuza.
"Kodwa-ke sizobona kugcina kanjani ngoba iwindi selizovulwa,” kusho umthombo waleli phephandaba ozazi zonke ezithinta iBucs.
Imizamo yokuthola uKhoza ukuba aphawule ngalolu daba iphunzile njengoba ucingo lwakhe belulokhu lukhale njalo kodwa engalubambi.
UJose Ferreira isikhulu esiphezulu kwiWits, uthi okwamanje abakahleli ukumdayisa uMkhwanazi.
“Kwathina sisenezinkinga emuva silinyalelwa njalo.
"Sisebhizinisini nathi ngeke sikwazi ukudayisa umdlali wethu omqoka,” kusho uFerreira.