IKHANSELA LE-ANC LINTSHONTSHE IZINKOMO
Umnikazi wepulazi ovuke wahlaba umkhosi
LIZOKUBA noKhisimusi omnyama ikhansela leAfrican National Congress (ANC) ebelisebenzela kuMasipala waseMthonjaneni, enyakatho-mpumalanga yeKwaZuluNatal, elilahlwe yicala lokuntshontsha izinkomo.
UMthokozisi Mthembu obeyikhansela kuwadi-7 kulo masipala, ulahlwe yicala lokubanjwa nezinkomo ezili-11 zokwebiwa ezibiza isamba sika-R60 000, okuvele ukuthi ubezintshontshe eMooihoek Farm, ePiet Retief, esifundazweni iMpumalanga.
Ngokusho kwelinye iphoyisa elingagunyaziwe ukukhuluma nabezindaba, uMthokozisi lezi zinkomo uzintshontshe ngehora le-12 ebusuku bomhla zili-16 kuZibandlela (December) wezi-2016.
Lithi uzilayishe elolini ebelishayelwa nguyena zandla zakhe, washosholoza nazo waze wangena KwaZulu-Natal.
“Umnikazi wepulazi uvuke wahlaba umkhosi, amaphoyisa abe esenza izivimbamgwaqo wabanjwa esengena eVryheid uMthembu nazo izinkomo ezilayishe elolini.
“Ebuzwa ngamphoyisa ukuthi uzithathephi lezi zinkomo, kucelwa namaphephamvume azo, kwahlwa emini, wabika imbiba wabika ibuzi.
“Kuthe uma amaphoyisa esethi ayambopha, waveza ukuthi uzinikwe ngabanye abafana, okuthe uma belandelwa labo bafana batholakala baboshwa naye.
“Kuthe uma seliqulwa icala bangabakhona ubufakazi obuhlanganisa laba bafana nalolu daba. Badedeliwe ikhansela lisala lodwa obishini,” kusho leli phoyisa.
UMthokozisi kuthiwa sekudlule imihlangano eminingana yokuhlala kwesigungu samakhansela kumasipala engasalubhadi kuyona futhi engabiki nokuthi kungani engayi emihlanganweni.
ILANGA libe selithinta uMnu Thami Shangase okhulumela uMasipala waseMthonjaneni othe ngokombiko abawutholile, kuthi- we uMthokozisi akaphilile, usesibhedlela.
“Siqala ukuzwa ngani ukuthi uboshiwe. Lolu daba sisazolulandela uma kuwukuthi lunjalo nge- mpela, umasipala uzobe sewuthatha izinyathelo ezifanele,” kusho uMnu Shangase.
Okhulumela amaphoyisa aseMpumalanga, uBrigadier Leonard Hlathi, uluqinisekisile udaba lokuboshwa kwekhansela. Uthi kumanje lingaphakathi kanti isigwebo salo sizokhishwa zili-12 kuZibandlela (December) nonyaka.
Kuthe uma amaphoyisa esethi ayambopha, waveza ukuthi uzinikwe ngabanye abafana, okuthe uma belandelwa labo bafana batholakala baboshwa naye. Kuthe uma seliqulwa icala...