Bayititilizile imali omasikandi abasafufusa
BAYITITILIZILE imali abaculi bakamasikandi ngoMgqibelo eCurries Fountain eThekwini emcimbini wokuphakanyiswa kwabaculi abasavelela nobekuhloswe ngawo ukugqugquzela ubumbano nokuthula endimeni yalo mculo.
Kubaculi besifazane, eqoqweni lokuqala kuhlomule uNelisiwe Nzama, kubaculi abangakadumi kwaba nguBhokweni kanti kwasebeqala ukuvela kube nguNtshebemnandi.
Bekubekwe isamba esinguR200 000 esihlukaniselwe abathathu abawinile emkhakheni ngamunye kulena emithathu.
Lo mncintiswano, oqale ezinyangeni ezimbalwa ezedlule, uphethwe ngayo le festival ebizwa ngokuThula Masikandi Festival ebihlelwe nguDkt Andile “Mzimbokhalimali” Dlamini.
Abaculi abasavelela abagcinanga ngokushiyelana bodwa inkundla, bezikhona nezinkunzi ebezizimazisile.
UDkt Dlamini ubonge ukuphuma kwabalandeli bomculo wesintu bezoseka umcimbi wakhe.
Uthe njengoba bekuseyisiqalo lesi, ngonyaka ozayo ulindele ukuba umcimbi ukhule kakhulu.
“Nginxusa ukuba osomabhizinisi basondele kithina beseke le nto enhle kangaka nohulumeni asixhase ngemali nezinkampani ezahlukene ngoba sihlose ukwenza umehluko omkhulu emacikweni akithi ikakhulukazi lawa angalitholi ithuba.
“Ngonyaka ozayo ngifisa ukwenza okukhulu ukuze nabanye basizakale,” kusho uDkt Dlamini.
Phakathi kwabanye abaculi ebebekhona nguMjikijelwa, Khuzani, Buselaphi, Amageza, Gadla, Mgojeli, oCelazimnike, Vumile Mngoma, Sgwebo sentambo noNgelo V kanti abaphathi bohlelo bekungabasakazi boKhozi FM, uNgizwe noBeekay bakwaMchunu, uZimiphi “Zimdollar” Biyela noMfanuphetheni Zulu weRadio DUT.
Nginxusa osomabhizinisi ukuba basondele...