INJABULO KUVULWA UMGWAQO
INJABULO kuvulwa ingxenye ewu2.2km yomgwaqo uMedway eRichards Bay, ogwini olusenyakatho yeKwaZulu-Natal okuzosiza kakhulu njengoba amaholidi kaKhisimusi esesemnyango.
Le ngxenyana yalo mgwaqo idle u-R53 million, uvulwe ngokusemthethweni ngoLwesibili nguNgqongqoshe wezokuThuthukiswa koMnotho, Ezokuvakasha nezeMvelo KwaZulu-Natal, uMnu Sihle Zikalala.
IMeya yaseMhlathuze, uMnu Mdu Mhlongo, idlulise ukubonga ngokuvulwa kwalo mgwaqo ophakathi kweRichards Bay Development Zone (RBDZ) nomgwaqo omkhulukazi iJohn Ross.
UMnu Mhlongo uthe lobu budlelwano phakathi koMhlathuze neRichards Bay Development Zone, buyakhula usuku nosuku, okuyinto evulela amathuba oku- khula komnotho.
“Ngesikhathi kubhodloke ibhuloho emgwaqweni iJohn Ross Highway, besibhekene nezingqinamba njengoba bekunzima ukungena nokuphuma kwezimpahla eRichards Bay, kunzima ezisebenzini, ezivakashini nakubashayeli ngokunjalo.
“Lolu tshalomali luzokwenza umehluko omkhulu emphakathini, ikakhulukazi njengoba sekufika isikhathi sokungcebeleka.
“Lokhu kuzohlomulisa kakhulu indawo yakuleli dolobha, iMeerensee,” kusho uMnu Mhlongo. Ngalesi sikhathi sonyaka leli dolobha lijwayele ukuhanjelwa ngabantu abaningi abasuke beya olwandle kanti ukunwetshwa komgwaqo kuzokwehlisa umthamo wezimoto kuJohn Ross Highway.
“Le phrojekthi iphinde igqugquzele idolobha uMhlathuze ukuba liqhubekele phambili nokuthuthukisa izindawo ezingasolwandle,” kusho uMnu Mhlongo.
Lokhu kuzohlomulisa kakhulu indawo yakuleli dolobha, iMeerensee...