Makungabi yize leze ukukhothama kweMisebe
KUNESISHO sesilungu esithi ophilayo uvala amehlo oseshonile kanti oshonile uvula amehlo ophilayo. Ukuvalwa kwamehlo eNkosi yamaNazaretha ohlangothini lwaseThembezinhle ekhothame ngeledlule, iNkosi Velamuhle “iMisebeyelanga” kaGalilee, kaMudliwamafa kaMayekisa, kaNhliziyo, kaMzazela, kaSokhabuzela, kaNyathikazi, kusivule amehlo ngamanye amalunga aleli bandla ikakhulukazi ohlangothini lwaseBuhleni.
Lezi zinhlangothi (olwaseBuhleni nolwaseThembezinhle) zimincile kuyimanje, zilindele isinqumo secala elimayelana nombango wesihlalo saseBuhleni. Kunamalunga aseBuhleni akhombisile ukuthi abantu kabayi ngenxanye bengemanzi, ashayele leli phephandaba ezwakalisa ukudabuka ngokwehlele uhlangothi lwaseThembezinhle, amanye abebhala elila ngalo muga owehlele ibandla lamaNazaretha.
Lokhu kwenze sabona ukuthi yize ukudlula komuntu emhlabeni kusishiya nobuhlungu kodwa kuveza nezinye izinto ezinhle ebezingaziwa noma ebezinganakiwe. Siyafisa ukuba ukudlula kweMisebeyelanga emhlabeni, kungabi nje yize leze, kumele kukhuthaze amaNazaretha ukuba athandane, abekezelelane kuthi noma ehlukene ngezinhlangothi kodwa angenelane - kuthi uma kwenzekile kwashaya isikhathi senkonzo elinye ilunga lingasethempelini lolunye uhlangothi, lingenise khona likhonze uNkulunkulu ngaphandle kokuthi licokofulwe.
Sifisa ukuba ukuhamba kweNkosi Vela kufane nemvula yothando ezonetha amaNazaretha ewonke, kuphele nendaba yokuthi phatha phatha, leli bandla seligijimisana ezinkantolo. Ibandla lamaNazaretha kuyaziwa ukuthi yiyona nto enkulu okuvela ukuthi uNkulunkulu ufike nayo eMhlabeni wayiphathisa umuntu omnyama. Ukuthi siyakukholwa lokho noma cha, kakusho lutho kodwa okubalulekile wukuthi kumele uma singabantu abamnyama futhi sizigqaja ngokungokwethu njengoba sihlale sisho uma kunguMandulo (September) ibandla lamaNazaretha singalishiyi.
Siyafisa ukuba abaholi namalunga aleli bandla bakuqonde ngelinye iLanga ukuthi into uma ikhula, ngokwemvelo nje, isuke izogcina iqhekekile - kukhona okuthile okuzoxebuka kuyona. Kufanele ngabe sesikujwayele lokho futhi siyakuqonda. Bekungaba kuhle ukuba ibandla lamaNazaretha lamukele ukuthi liyakhula mihla namalanga, izindlu zalo ngokwehlukana kwamakhosi azo zibekezelelane, zazi ukuthi kunekhaya elincane, elikhulu, eliphakathi njalo njalo, kungenelwane, kuphilelwane.
Kuba kubi uma sekubikwa ukuthi kukhona ilunga lohlangothi oluthile elithe lihambele umcimbi welunga elikhonza kolunye uhlangothi lafike lanyonkolozwa, lakhonjwa indlela. Kakudingi-ke ukuba uze ube yilunga lebandla lamaNazaretha ukuba wazi ukuthi umsunguli waleli bandla, uMprofethi Isaiah Mloyiswa Mudliwamafa Shembe akakaze nangelilodwa agqugquzele udlame. Yize kuvela ukuthi wayepholofithile ukuthi kukhona isimo sokwahlukana kwebandla esiyoba khona kodwa wayengakaze agqugquzele ukungazwani kwabantu - egameni lobuNazaretha.
Umlando uyakuveza ukuthi wayethanda futhi ehlonipha ngisho nababengahambisani nemibono yakhe yezenkolo. Wayehla enyuka esiza abantu egibele ihhashi, okungenye yezinto ezenza ukuba aze achazwe njengesikhonzi senhlupheko.
Siyafisa ukuba amaNazaretha, kulesi sikhathi esemanzini, afunde isihlabelelo sawo sama-203, akhumbule usizi oselubhekene naleli bandla ngenxa yezidubedube okubalwa kuzona ukugijimisana ezinkantolo - nakho-ke ukuhamba kwenkosi yawo, kungakhathalekile ukuthi ngawaluphi uhlangothi.
Maningi amakhosi asedlulile kuleli bandla kodwa sibona enzelwa phansi ngamaNazaretha uqobo. Ayahamba amakhosi, asale amaNazaretha aklwebhane. Nithi mawafike athini la makhosi koyisemkhulu? Sithi mayilale ngokuthula iNkosi yamaNazaretha, uNkulunkulu avakashele umuzi wayo abophe umndeni nabebesondelene nayo ngamabhande kamoya. Lala ngokuthula Nhlanzi.