Baculele izihlalo emcimbini kamasikandi
ZIPHOXEKILE izinkunzi zikamasikandi ziculela izihlalo emcimbini obungoMgqibelo ePeople’s Park eMoses Mabhida Stadium eThekwini.
Lo mcimbi, obizwa ngeNkundlakazi Festival, bekungowokuqala wenzeka.
Umcimbi uqale emini kodwa kuze kwashaya izikhathi zantambama abantu beyingcosana. Kushaye isikhathi sokungena abebeseqhulwini ohlwini inkundla ibanda.
Phakathi kwabaculi umcimbi obugabe ngabo nguThokozani “Somnandi” Langa, Nkosinathi “Qhoshangokwenzakwakhe” Sibisi, Phumlani “Mfezemnyama” Khumalo, Sbongiseni “Mjikijelwa” Ngubane, Mlungiseni “Khandalenja” Khumalo, noKhuzani “Indlamlenze” Mpungose okunguyena ovale umcimbi.
Bekukhona noDJ abadumile phakathi kwabo okubalwa noMerlon.
Indlela abebephoxeke ngayo abaculi, uMjikijelwa wehluleke nokuzibamba, wabaqonda ngqo abahleli bomcimbi, wezwakalisa ukungenami kwakhe ngendlela umcimbi ohambe ngayo.
Ekhuluma nabo khona emcimbini uphakamise ukuthi ngokulandelayo kuyoba kuhle ukuba baxhumane nabo bengamaciko ukuze babalekelele ekuwuhleleni (umcimbi).
Noma ubengakhulumi ngokudinwa kodwa ubekhombisa ukuthi udumele.
Iphawula kwiLANGA LeTheku iMfezemnyama ithe kuyawehlisa umfutho ukuba ufike emcimbini uzitshela ukuthi uyojabulisa abantu kodwa ufice idlanzana nje.
USomnandi yena uthi akakugqi- zanga qakala ukuthi uculele idlanzana labantu kulo mcimbi. Uthi ukumenywa kwakhe nje kukodwa ukuba abe yingxenye yalo mncimbi kumenze wazizwa ehloniphekile.
Omunye obesethimbeni labahleli bomcimbi, iNkosi Mthayiza Khumalo, ephawula kwiLANGA
LeTheku uthi inhloso yomcimbi bekuwuhlanganisa abantu nokuvula amathuba omsebenzi.
Iphawula mayelana ngokungahambi kahle komcimbi, iNkosi Khumalo ikhale ngemvula, yathi yiyo edale ukuba umcimbi wethanyelwe yingcosana yabantu.
Kulo mcimbi uKhuzani unikezwe umklomelo wokuba ngumculi kamasikandi ohamba phambili ekuqhakambiseni lolu hlobo lomculo.
Umcimbi udonse waze waphela cishe ngemuva kancane kwehora le-11 ebusuku.